PLDT hinatid ni Savi sa 3rd place

MANILA, Philippines — Humataw si Fil-Canadian Savi Davison ng 29 points mula sa 26 attacks at tatlong service aces para banderahan ang PLDT sa 25-20, 20-25, 25-21, 25-22 pagdaig sa Creamline at sikwatin ang bronze medal ng 2026  Premier Volleyball League (PVL) Invitational Conference kahapon sa Smart Araneta Coliseum.

Ito ang ikalawang third place finish ng High Speed Hitters matapos puma­ngatlo sa nakaraang 2026 All-Filipino Conference.

Nauna nang nagpasabog ang 27-anyos na outside hitter ng career-high 37 markers sa kanilang 25-17, 23-25, 21-25, 25-23, 15-12 paggupo sa Cool Smashers.

“I’m happy that we were able to finish on a win,” sabi ni Davison.“Although we weren’t able to make it to the finals, I am so proud of our group.”

Nagdagdag si Jovelyn Prado ng 12 points at may 10 markers si Kim Kianna Dy para sa High Speed Hitters, habang tumipa si setter Kim Fajardo ng 15 excellent sets at may 17 digs si libero Kath Arado.

Pinamunuan ni Jaja Santiago-Minowa ang Creamline sa kanyang 19 points at may 16, 11 at 10 markers sina Jema Galanza, Tots Carlos at Ishie Lalongisip.

Maglalaro ang 6-foot-5 na si Santiago-Minowa para sa San Francisco Signal sa American professional league League One Volleyball (LOVB) sa Enero ng 2027.

Ito ang unang pagkakataon na walang nakuhang medalya ang Cool Smashers sa nakaraang 19 komperensya.

Samantala, pumalo sina Trisha Tubu at Ces Molina ng tig-14 points sa 25-10, 25-15, 25-15 pagdaig ng Farm  Fresh sa guest team Ho Chi Minh City ng Vietnam para tumapos sa fifth place.

Nag-ambag ng 13 markers si rookie Jonna Perdido kasunod ang 11 points ni middle blocker Riri Meneses, habang may 12 excellent sets si Fil-Am setter Alohi Robins-Hardy.

Kasalukuyang naglalaban ang Nxled Chameleons at EST Cola ng Thailand para sa gold medal habang sinusulat  ito.