Lapu-Lapu ni-activate sa Task Force El Niño

CEBU, Philippines — Gi-activate sa Lapu-Lapu City Government ang Task Force El Niño isip pagpangandam sa mas init ug mas uga nga kahimtang sa panahon nga posibleng magpadayon hangtud sa unang bahin sa tuig 2027.

Gihisgotan ang pag-activate sa task force atol sa third quarter special meeting sa Lapu-Lapu City Disaster Risk Reduction and Management Council (DRRMC) niadtong Huwebes diin gihisgotan sa mga opisyal sa siyudad ang mga lakang sa pagpangandam ug pagpakunhod sa posibleng epekto sa El Niño. Matud ni Mayor Ma. Cynthia “Cindi” King-Chan nga gusto sa siyudad nga makapangandam og sayo ug masiguro nga organisado ang pagtubag sa posibleng epekto sa El Niño sa komunidad. Gipresenta ni Engineer Jhomer Eclarino, chief weather forecasting specialist sa Philippine Atmospheric, Geophysical and Astronomical Services Administration (PAGASA) Mactan ang pinakabag-ong El Niño outlook atol sa tigom. Matud sa latest outlook, posibleng mokusog pa ang kasamtangang El Niño ug magpadayon hangtud sa unang bahin sa tuig 2027 hinungdan nga gipaspasan sa siyudad ang pagpangandam ug koordinasyon.

Gipangulohan sa City Disaster Risk Reduction and Management Office (DRRMO) ang diskusyon kabahin sa City Ordinance No. 17-074-2026 nga naglatid sa pag-umol sa Task Force El Niño ug nag-establisar og koordinadong mekanismo alang sa pagpangandam, pag-monitor ug pagtubag sa epekto sa El Niño.

Ang mga konsehal sa siyudad nga gilangkuban nila ni Annabeth Cuizon, Rufo Bering ug Marciano Alforque Jr ang author sa maong ordinansa. Gilakip sa task force ang Office of the Mayor, City Administrator’s Office, DRRMO, mga concerned city department, national government agencies ug mga komitiba sa konseho sa siyudad ug ang DRRMO maoy magsilbing secretariat niini.

Ubos sa ordinansa, mahimong i-activate ang task force kong mopagawas ang DOST-PAGASA og El Niño alert o advisory o pinaagi sa direktiba sa mayor. Motutok ang task force sa padayon nga pag-monitor sa mga concern nga mahimong maapektohan sa El Niño, lakip ang lebel sa tubig, kahimtang sa panglawas, presyo sa pagkaon, insidente sa sunog ug peace and order. Ang tigom sa DRRMC gisundan sa Third Quarter Nationwide Simultaneous Earthquake Drill diin naka-practice ang mga personnel ug responders sa siyudad sa mga pamaagi sa pagtubag sa linog ug nakapalig-on sa ilang disaster preparedness. BDB BANAT NEWS