Kabalaka sa mga mag-uuma nga dili matukib

Kini ang akong nasaksihan sa mga mata sa mga mag-uuma nga akong nahimamat atol sa akong pag adto sa bukirang baranggay sa Dakbayan sa Sugbo kagahapong adlawa kay lagi gipangumusta nako ang ilang pagpangandam sa Super El Niño apan nasayran nako nga nag antos na silang daan karon pa lang sa ka nihit sa supply sa tubig nga ibisbis sa ilang mga pananom. Matud nila nga nagkuyaig na gani sila karon nasinati pa ang pag uwan uwan unsa nalang kaha kong mograbe na ang pagkastigo sa kinaiyahan ang Super El Niño.

Kasagaran sa mga gagmayng mag uuma sa Barangay Sudlon uno ug dos nga akong nabisita nagsalig lang sa tubig sa uwan nga ilang ipundo sa binangag nga yuta ug maoy ilang ipasuyop sa water pump aron ibisbis sa mga utanon ug kong matinood nga molanat hangtud sa sayong bahin sa tuig 2027 ang El Niño segurado gyud nga magmugna kini og kadaut sa panginabuhi ug sa kinabuhi sa mga mag uuma sa bukid. Busa karon pa lang gibati na sila og kalisang sa unsay mahitabo kanila.

Nihangyo sila karon sa kagamhanan nga mahatagan og water containers nga kapondohan og tubig ug labaw sa tanan maapil sila sa crop insurance kay maayo nalang nga mabayran sila sa mga tanom nfa mapilde sa el niño. Sa mga saop sa yuta o kadtong nagtikad sa yuta nga dili ila wala man kuno sila maapil sa insurance nga maoy gusto nilang mahatagan og katin-awan kay lagi magsige man og pasiatab ang city agriculture nga mas maayong mo avail ang mga mag uuma sa crop insurance. Kuwang lang seguro sa pagsabot ang ahensya sa kagamhanan sa proseso unsaon pag apil sa insurance.

Base sa mga balita, andam naman kuno ang guberno sa super el niño pero lahi man ang akong nasaksihan sa aktwal nga kahimtang sa nataran ug mismo sa umahan sa mga tawo kay wala pa man bisan anino sa mga water container nga naabot didto, aw basin inig grabe na sa kainit sa panahon ayha nila ipang apod apod busa huwata nalang mga higala.

Sa tinuod lang ang super El Niño usa ka dakong hulga sa kinabuhi sa katawhan nga angayang seryosohon sama sa gihimo sa mga silingang nasud sa Asya nga wala na mag export sa ilang bugas kay gigahin nila kini sa umaabot nga ting gutom, samtang ang Pilipinas nakatutok sa pagpalagpot sa besi presidente aron maseguro nga dili na kini makasumbalik sa pagpanimalos kanila.

Sa pulong pa lang nga very strong, ingon usab niini ang impact ngadto sa mga tawo, gihatagan man kita og kahigayonan nga makaandam busa mangandam ta dili nalang nato isalig ngadto sa guberno ang tanan kon dili kita na mismo ang moluwas sa atong kaugalingon aron dili kita malunosan sa kagutom. Kong dunay super El Niño naa man pud kitay labing super ang atong Ginoo nga maoy moluwas kanato sa panahon sa atong pagpanginahanglan. Busa mag ampo lang kita makasugakod niining dako nga pagsuway karon.