EDITORYAL - Nagkaanam og kalubong ang Pilipinas

Dili palang dugay, gibasura ni US President Donald Trump ang giduso nga usa ka semanang ceasefire sa nasud sa Iran bugti sa pag-abli og balik sa Strait of Hormuz ang pagtangtang sa US naval blockade ug paghunong na sa binayloay og bomba.

Nagpasabot kini nga dako ang posibilidad nga magpadayun pa kining giyera ug makapadako pa gyud ang problema sa suplay sa lana sa kalibotan apil na ana ang Pilipinas. Kauban ani ang epekto sa ekonomiya ug presyo sa halos tanang palaliton.

Kagahapong adlawa, nag transport strike ang pipila ka grupo sa mga drayber ug midemanda og pagpabalik sa presyo sa lana ngadto sa P55 kada litro.  Pero unsa may mabuhat sa gobiyerno sa Pilipinas kun sa tinubdan sa petrolyo gasugod ang problema sa suplay?

Bugtong solusyon para magpabiling dili maapektahan ang katawhan aning tensiyon sa Middle East mao ang pagbalik sa kontrol sa gobiyerno sa industriya sa lana ug i-subsidize kini para dili mahan-ok sa publiko ang pas-anonong epekto sa pagsaka sa presyo.

Hunongon ang monopoliya sa pribadong oil importers tungod kay pirmeng sila maoy nakaginansiya , may giyera man o wala sa ME.

Sunod nga maayong solusyon mao ang paghatag sa gobiyerno og seryusong konsiderasyon sa pagpakusog sa paggamit sa renewable energy sa nasud.

Ambisyunon ang 100 porsiyentong source sa elektrisidad magagikan tanan sa renewable energy dili  gikan sa mga planta nga nagsalig sa petrolyo ug coal.

Kay kung naobserbahan lang gyud sa tanan, nagkadugay, nagkadako na og maayo ang cost of living dinhi sa nasud kun itandi sa mga silingang kanasuran dinhi sa South East Asia.

Kinahanglan gyud suportahan sa gobiyerno ang mga startup business sa mga Pilipinong makatabang masolusyonan ang problema sa enerhiya ug petrolyo sa nasud.

Nagkadako ang inflation rate sa nasud,  dunay ang eksplinasyon ang gobiyerno bahin ani. Pero dili ni mao ang solusyong kinahanglang trabahoon.

Naay daghang solusyon apan mura og dili gustong lihukon sa gobiyerno ug gisalig lang ngadto sa pribadong mga negosyante.

Kung ingon ani maghunahuna ang mga naa sa gobiyerno, dili gyud mahaw-as gikan sa kasamtangang kahimtang ang katawhan ug ang nasud.