Lutaw pirming ginansiya

Gilibkas na ang tulo ka buwan nga suspension sa excise tax nga giimponer sa kerosene ug liquefied petroleum gas (LPG).  Matud pa ni Finance Secretary Frederick Go, ang pagsuspenso sa excise tax, nakatibhang sa kita sa kagamhanan og mokabat P2.5 bilyones. Tuyo sa pagsuspenso sa excise tax mao ang pagpagaan sa epekto sa taas nga presyo sa produkto’ng petrolyo ngadto sa mga konsumidor ug magpapatigayon.  Apan mora'g magpapatigayon ra man ang nakapahimulos kay wala ma’y nabatyagan alibyo ang mga konsumidor sa presyo sa LPG. Kon sa billiard pa, “natural tako” lang ang tirada sa mga negosyante kay, buhisan man o dili, lutaw man pirmi ang ginansiya.”  Muleeng!

Lisod ang kahimtang

Segun sa datos sa Commission on Population and Development (CPD), nagkadaghan ang mga magtiayong Pilipino nga mipili sa live-in o common-law nga relasyon inay nga magpakasa,l sa tuyo nga makasugakod sa panginabuhi ug makalikay sa mga wala planoha nga pagpanganak.  Masabot nato nga praktikal na karon ang mga bag-ong magtiayon tungod sa kalisod sa ekonomiya. Matud pa sa akong soltero’ng silingan, “Lisod tawon akong kahimtang, kay kon magpabukid, umaw; kon magpadagat, susot; kon manguyab, way mosugot.  May’pa mag live-in.”  Saoonz!

Nangluod ang tiguwang

Gipaneguro sa konseho sa dakbayan sa Sugbo nga makapadayag gihapon si Bise Mayor Tomas Osmeña sa iyang mga panahom ug panglantaw atol sa mga deliberasyon sa konseho bisan pa man sa bag-ong gisagop nga House Rules tungod kay gitamod sa mayoriya ang taas nga kasinatian sa bise mayor sa pangagamhanan.  Ni’ng maong katin-awan, tataw nga wala patak-oma ang bise mayor sukwahi sa iyang unang pamahayag. Kon ugaling mo-insister gihapon ang bise mayor nga gipahilom na siya, basin husto ang komento sa akong amigo nga, “Ay daah, nangluod ra ang tiguwang.”  Fezteleern!

Kayo-an nga pili-an

Human gipasar sa konseho sa dakbayan sa Sugbo ang resolusyon nga nagsalikway sa laraw nga apilon ang SRP sa rota sa CBRT, namahayag usab sa Mayor Nestor Archival nga walay awtoridad ang city government sa pagkanselar sa SRP loop tungod kay ubos man sa nasudnong kagamhanan ang maong proyekto.  May punto ang mayor ni’ng iyang pamahayag. Isip beneficiary lamang, wala sa Cebu City ang katungod paghikling sa maong proyekto. Kon mopugos gyud ang syudad sa iyang kagustohan nga Bulacao-Talamban nga rota lang ang ipatuman, haum kita sa panahom nga, “Ikaw pa’y kayo-an, ikaw pa’y pili-an.”  Madahaan!

Chinese si Rizal

Atol sa usa ka symposium didto sa Jinan University, sa Guangzhou, China, adunay pundok sa mga Chinese scholars nga nangangkon nga ang probinsya sa Batanes sakop kuno sa China, isip natural geographical extension sa nasud sa Taiwan.  Nagbuot-buot na lang gyud kining mga Intsik og pangangkon og mga lugar.  Kon inintsik pa unta ang sinultihan sa Batanes, basin makaingon kita nga posible ang ilang pangangkon. Basin sa sunod, himoon na pud nilang rason sa pagpangangkon sa Batanes nga “kaliwat og Chinese ang atong national hero nga si Jose Rizal.” Pagkatoytoy!