Mga makililimos nisi-aw na sad

Kini ang atong masaksihan ilabi na sa kadalanan karon nga nagkatag na usab ang mga magpakilimos sa kadalanan, nawagtang naman unta sila kaniadto ilabi na panahon sa pandemic apan karon nisiaw na usab.

Dili man sa pagpaminus niining mga tawhanan apan aduna may lagda nga nagdili sa pagpakilimos sa kadalan.

Delikado alang kanila ilabi na kadtong mga bata nga morag pakigpatentero sa mga sakyanan.

Naa pay mga tigulang nga mangayo sa mga tawo sa sakyanan hilabihan ka peligro nga madisgrasya.

Ang uban mosaka sa mga PUJ magdala pa og sobre nga ipanghatag sa mga pasahero aron sudlan og kwarta. Anaay gadala dala og tambol kay kunohay manaygon, pastilan dili ra ba nila sila motoo seguro og pasko pero gamiton ang pasko alang sa ilang pagpakilimos.

Kinsa man ang dili maluoy sa mga kabus nato nga mga kaigsoonan. Apan klaro man kaayo ni sila nga nagtinapolan kay kasagaran baskog pa man ug taas kaayo gani og resistensya diin uwan ug init ang ilang gisagubang pero wala man madutli og sakit, ang sakit na ang nahadlok nila.

Ang uban gani gadala og mga batang masuso isip props aron makakabig sa kaluoy ug mahatagan og kwarta ug pagkaon.

Kasagaran sakop sila sa usa ka minority nga grupo. In fairness sa ilang community, anaa baya silay livelihood program alang niadtong mga kugihan kinsa nanginabuhi nga adunay dignididad. Apan ang uban kanila gusto lang gyud magpangayo sa ubang tawo.

Nabantayan nako nga wala namay lakang ang mga LGU sa pagbadlong aning mga tawhanan, unsa man gi-tolerate na ni nila? O wala nalang gyud tagda? Sa Cebu City nahinumdum ko nagpa presscon pa kaniadto ang Anti-Mendicancy Board sa ilang pag-rescue niining nagpakilimos sa kadalanan.

Gani nihulga pa sila nga multahan ang masakpan nga mohatag sa mga makililimos bisan gani pagkaon dili pwede mohatag.

Asa naman sila karon? usa na katuig ang maong relaunching sa programa apan murag nalimtan naman.

Maluoy man unta kita apan depende sa sitwasyon, ang atong kaluoy mopasamot sa ilang katapolan aw mas maayo og dili nalang.

Kadtong mga tawo nga tabangon kaayo mao ang angayan nga tagdon dili kadtong mga tapolan nga naanad sa pagpangayo sa uban.