Nagbarug apan nagtikubo

Namahayag si Presidente Bongbong Marcos nga nakabarug na pagbalik ang Pilipinas sa epekto sa coronavirus pandemic, sa kahikurat sa gubat sa Russia ug  Ukraine ingon man sa kagubot sa Middle East ug nga aduna na’y positibo’ng kalamboan sa economic performance sa nasud. Maanindot paminawon ang maong pamahayag apan sayod kita nga ang maong kalamboan statistiko pa lamang.

Gipaabot pa sa katawhan ang maayong epekto niini sa tagsa-tagsa nato nga kinabuhi. Mao na’y giingon sa akong amigo nga “Nakabarog na lage ang tiil, pero nagtikubo gihapon ang lawas sa tumang kalisod.” Fezteleern!

Dali nga kahumanan

Alang kang Cebu City Mayor Michael Rama, hinanggaw (stupid) ang sugyot sa usa ka konsehal nga ipahunong ang implementasyon sa Cebu Bus Rapid Transit (CBRT).

Alang sa mayor, dili makiangayon ang maong sugyot labi na sa DOTr, World Bank ug sa national government. Dili man tingale nato uyonan ang paghingalan nga “hinanggaw” sa sugyot nga pag-scrap sa proyekto, apan tataw nga dili kini ang tukmang solusyon. Dali nga kahumanan sa proyekto ang gikinahanglan aron kini  mapahimuslan. Matud pa bitaw, “Ang tanan’g mahimong usbon sa proyekto, paga-usbon, hangtud nga wala na’y panahon nga mahibilin sa pag-usab niini.” Muleeng!

Lubog nga bola’ng kristal

Gisikop sa kapolisan si Ivan Borromeo, alyas Mark Lester Alvarez ug Celine, tungod sa giingon’g pagsakiyo niini og mokabat sa P50 milyones sa iyang mga biktima pinaagi sa pagpaka-aron-ingnon nga feng shui expert. Base sa imbestigasyon sa mga polis, nagsugod si Borromeo sa iyang pagpangilad kaniadto pa’ng tuig 2015. Taud-taud gyud ang iyang paggamit sa iyang abildad. Hayan mihupas na ang iyang gahum pagka-feng shui expert kay wala na man niya makita sa iyang bola’ng kristal nga madakpan diay siya. Basin lubog na kini tan-awon. Ning pagkasikop ni Borromeo, tan-awon nato kon mailad ba usab niya ang husgado. Madahaan!

Talentado ang polis

Sa pamahayag ni NCRPO Chief Police Major General Melencion Nartatez Jr., daghan’g mga case folders sa mga police o:cers nga gipaubos sa imbestigasyon sa kasong administratibo ang gikataho nga nangahanaw. Gituohan nga kakunsabo sa mga gi-imbestigar ang mga opisyales nga nagpahigayon sa summary dismissal proceedings. Sa pagkahanaw sa maong mga case folders, maingon nato nga nahanaw usab ang ebidensya batok sa mga sinumbong. Talentado gyud ang atong mga polis. Sa kalinaw tigbalantay na, sa ebidensiya, mga salamangkero pa. Pagkatoytoy!

Kaduha naglumos

Gikataho nga si Jonathan Perciva Pava, usa ka construction worker, nalumos sa dihang naligo siya sa Pasig River samtang nag-inom sila kuyog sa iyang kauban sa trabaho. Hubog si Pava sa dihang misawom siya sa tubig. Daghan na ang panghitabo nga susama niini diin ang usa ka hubog mahunosan sa kinabuhi sa iyang pagkaligo. Mahulagway nato ang kutay sa panghitabo diin nag-una ang paglumos sa iyang mga suliran ang biktima pinaagi sa pag-inom og ilimnon’g makahubog; dayon gilumsan usab niya ang iyang kinabuhi pinaagi sa pagsawom ilalom sa tubig. Impaaas!