Pamaskong dula sa plaza, kapilya
MGA piling bayan na lang sa Luzon at Visayas isinasadula sa publiko ang Kapanganakan ni Hesukristo. Kaya dinadayo to ng mga videographers, iskolar ng panitikan, at turista. Nakapanood ako nito sa Pakil, Laguna.
Engrandeng palabas ang Kapanganakan. Nagsisimula sa plaza at nagwawakas sa patio ng simbahan o kapilya. Dalawang oras kasama ang mga awit ng koro, tugtog ng banda at pagtula ng mga karakter.
Pinipili ng Comite de Festejos ang mga gaganap na Maria at Jose, Elizabeth, Herodes, Tatlong Hari, mga pastores at anghel. Maraming araw ang ensayo, kasama ang koro at banda.
Sa Bisperas ng Pasko magsisimula ang Kapanganakan sa pag-anunsyo ni San Gabriel kay Maria na siya ang magiging ina ng Diyos. Kasunod ang pagdalaw ni Maria sa buntis na pinsang Elizabeth.
Tapos ang nabuntis na ring Maria ay isasakay ni Jose sa buriko patungong Bethlehem. Hihinto sila sa tatlong bahay na may balkon, kalimitan nasa tabing plaza. Patula silang makikiusap na patuluyin para magpalipas ng gabi. Patula rin silang itataboy ng maybahay.
Lalakad sila patungong simbahan kung saan may eksenang sabsaban. Isisilang si Hesukristo habang umaawit ang mga anghel. Sa gilid ipakikitang nililinlang ni Herodes ang Tatlong Hari. Pero matatagpuan pa rin nila at ng mga pastores ang Banal na Sanggol.
Taimtim ang mga manonood. Abala naman sa paghahanapbuhay ang mga nagtitinda ng mais, prutas, ice candy. Malalim na ang gabi kaya inaantok na ang mga bata.
Biglang masisiraan ng bait si Herodes. Ipapapatay ang mga bagong silang. Hahabulin ng mga sundalo niya ang mga bata sa plaza. Maghihiyawan ang mga ito, lulundag sa balikat ng mga ama o magtatago sa saya ng mga ina. Lahat maligayang sasalubong sa Pasko.
* * *
Makinig sa Sapol, Sabado, 8-10 ng umaga, DWIZ (882-AM).
- Latest
