Human na'ng huwaw

Napupos na ang kapin sa unom ka dekadang huwaw sa medalyang bulawan alang sa basketball team sa Pilipinas gikan sa Asian Games.

Kini human gilampaso sa Gilas ang Jordan sa iskor nga 70-60 atol sa championship game niini niadtong Biyernes sa gabii didto sa Hangzhou Olympic Sports Center Gymnasium sa Hangzhou, China.

Unang higayon ni sukad niadtong 1962 nga nakakuha og medalyang bulawan ang mga basketbolistang Pinoy sa Asian Games.

Ang mga magduduwa sa Pilipinas gipangulohan nilang Justin Brownlee, Ange Kouame ug Scottie Thompson.

Kulbahinam ang duwa apan mipatigbabaw ang Gilas nga karon ubos na sa bag-ong head coach nga si Tim Cone.

Ang kadaugan sa Gilas maisip nga nindot nga sinugatan alang kang coach Tim Cone nga mikulit dayon og kasaysayan sulod lang sa hamubo nga panahon.

Sa maong kadaugan makita nga labaw sa tagsa-tagsa ka talento sa mga magduduwa mahinungdanon ang kalantip sa coach.

Na pruwebahan ni coach Tim Cone nga dunay igong talento ang mga Pinoy nga basketbolista ug takos ang Gilas nga mahimong kampiyon.

Nagkinahanglan lang sila og coach nga husto og abilidad ug dunay katakos nga moalsa sa team ug dili magpunay og pangita og lansis sa iyang mga kakuwangan.