Tinuig nga ulug-ulog
Unsay kapuslanan sa pagpaminaw sa ikaduhang State of the Nation Address (SONA) ni Presidente Ferdinand Marcos Jr. nga nahibawo na man ta nga:
• Angkunon nga nilambo ang nasud bisan mas nagkalisudlisod ang katawhan tungod sa kataas sa presyo sa mga palaliton, kaubos sa suholan ug kakuwang sa trabaho; ug
• Himuon ang naandang mga saad paghimong mas abunda ug mas barato sa pagkaon ug pagpalambo sa katakos sa burukrasya pagserbisyo sa katawhan bisan kon wa lang nagpadayon kon dili nisiaw ang mga kartel sa mga negosyo ug pangurakot sa iyang administrasyon.
* * *
Sa iyang 13 na ka laag sa ubang kanasuran (kaduha sa US, kaduha sa Indonesia, kaduha sa Singapore, kausa sa Belgium, kausa sa Cambodia, kausa sa China, kausa sa Japan, kausa sa Switzerland, kausa sa Thailand ug kausa sa United Kingdom), nga nagtangkil sa iyang mga paryente ug binatalyong mga delegasyon, kansang kinatibuk-ang gasto wa pa niya itug-an, nagpahumot siya sa langyaw'ng mga lider ug mga negosyante pinaagi sa pagpasalig nga:
• Ipatigbabaw ug tahuron sa iyang administrasyon ang rule of law; ug
• Iyang panalipdan ug palambuon ang human rights.
* * *
Sa ilang joint statement ni US President Joe Biden sa iyang pagduaw sa White House sa Mayo ning tuiga, nagkauyon sila sa importansiya sa lig-on nga democratic institutions, rule of law, ug pagtahud sa human rights, apil ang freedom of expression, press, and association.
Sa iyang pakigtagbo ni United Nations Resident Coordinator Gustavo Gonzales dayong banos sa Malakanyang sa Hunyo sa niaging tuig, gipaneguro ni Marcos ang high level of accountability sa human rights violations.
* * *
Pero iyang gibakwi ang tanan niyang ulug-ulog sa US, sa UN ug sa ubang kanasuran pinaagi sa:
• Pagyaka sa imbestigasyon sa laktod nga pinatyanay sa kampanya sa drugas sa iyang gipulihan nga administrasyon, nga sa opisyal nga ihap sa kapolisan niabot og 6,200 ug sa pagtuon sa human rights groups niabot og kapin 30,000; ug
• Pagbabag sa International Criminal Court (nga iyang gihangop isip senador niadtong 2011) sa paghimo sa wa niya buhata nga paghatag og hustisya sa mga biktima sa extrajudicial killings nga nahitabo sa katuigan nga sakop pang Pilipinas sa ICC sa 2011 hangtod sa 2019.
* * *
- Latest
