Pagpanglutos

Duna koy nakita sa YouTube sa mga nagsunod sunod nga riots didto sa nasud sa France. Ang karaang simbahan niadto pang 16th Century ang nasunog o gisunog. Wala pay labot sa mga looting incidents kay lagi usa kini ka protesta kalabot sa batan-on nga napatay sa mga police diha sa kadalanan gumikan sa suliran sa trapiko.

 Ang uban nga nihimo og komentaryo nga ang maong hitabo dili na usa ka protesta hinunoa, usa na kini ka dakong terorismo. Dili lang kay nahitabo kini sa France. Nahitabo usab kini sa mga nagkadaiyang mga simbahan sa Estados Unidos.

 Vandalisms ug desecrations maoy gihimo sa mga nagkadaiyang mga tawo nga dunay kaligutgot sa relihiyon.

Dayag nga ning mga panahona karon nibalik ang kaikag sa demonyo sa paglutos sa Simbahan nga tinukod ni Kristo.ilang gi normalize ang kapintas bisan gani diha sa artistic expression. Ug ang nakasakit pa gyud niini mao nga daghang mga tawo nga anaa mismo sa simbahan ang niunay og daut ning maong institusyon pinaagi sa ilang gihimong experimentation.

 Ang nahitabo karon mao nga ang simbahan buot mosunod sa kapritsong kalibutanon bisan pa man kun kini nakaapekto sa hustong pagtulon-an. Gihimo ang pag compromise aron lamang mamahimong in sa trend ning panahon karon. Tungod sa kahadlok sa mga pangulo sa simbahan nga mawad-an og mga sakop mao nga mohimo sila og compromise pinaagi sa pasalig nga ang tanan dawaton.

Nagkinahanglan kita og mga pari ug mga obispo nga hugtanong mobarog sa orthodoxy. Hugtanong manalipod sa tradisyon. Madasigong mopaila kang Kristo ug dili mauwaw nga moangkon nga sila mga tinun-an niya. Mga tinun-an nga nahimong maisogon hangtud sa katapusan. Nahimong haguka ang tanan ning mga panahona. Makalibog kun unsa gyud ang padulngan sanglit ang kadaghanan nahimo mang paling paling ug dili na seguro sa matag desisyon nga pagahimoon.

 Moabot tingali ang panahon nga kining tinukod na simbahan mamahimong kahugpongan lamang sa katawhan apan hawa sa diosnong presensiya. Unsa kaha ang atong ikatubag kun ang atong Ginoo mobalik ug mangutana: “Makakita pa ba kaha ako og pagtuo ning katawhan karon?”