EDITORYAL - Kahakog sa adunahan

Usa sa nakamugna og kasamok sa mga tawo kaning paghikaw kanila sa ilang katungod nga makaadto sa baybayon sa kadagatan kun ilang gustohon.

Kini tungod kay dunay mga nanagiya og luna sa atubangan sa mga baybayon nga gipangkuralan sa mga tagiya niini.

Ang uban, gipangwartahan gyud pinaagi sa pagpangayo og pulta sa mga gustong makaadto sa baybayon aron makaligo.

Dili gani sila matawag nga resorts, basta naa lay kural ilang luna, ang molabang pabayron gyud.

Sa laktod, kaning mga adunahang nanagiya aning mga lunaa, namintaha og maayo kay sayud man silang ang mga tawo moadto gyud og dagat aron mangaligo.

Gawas aning mga pribadong luna, naa say gipanagiya unta sa gobiyerno nga gipang-angkon sab og mga impluwensyadong mga tawo aron himuong resorts nga ilang papultahan.

Sa ngalan sa environmental protection ug preservation kunohay apan diay to para lang sa ilang pangwarta kay gihimong resort.

Gipangabog ang mga nanimuyo nga mga mananagat aron masolo kining mga lunaa para sila mangwarta.

Ang ilaha ra untang mga luna maoy ilang kuralon ug kana ray ilang pangwartahon, way labot ang baybayon ug ang dagat nga maoy tuyo sa mga tawo.

 Ang LGUs maoy angay mosiguro nga dunay gyuy right of way ang publiko padung sa baybayon bisan unsang orasa.

Ang kabaybayunan ug kadagatan sa tibuok Pilipinas gipanagiya sa tanang Pilipino, dili lang sa mga tagiya sa mga luna sa atubangan sa baybayon.