Full-blast sa CVIRAA meet karong adlawa

CEBU, Philippines — Nabalik na sa naandang kalihokan ang paugnat sa kusog alang sa mga tinun-an human sa tulo ka tuig nga gihimo kini nga virtual ug bubble-type tungod sa pandemiya.

Ang Department of Education-VII nibalik na sa in-person sporting events pinaagi sa Central Visayas Regional Athletic Association (CVIRAA) Meet nga opisyal nga nagsugod kagahapon sa bag-ong  Carcar City Sports Complex.

Mao pa sab kini ang labing unang higayon nga mi-host ang maong siyudad sa CVIRAA Meet.

Matud pa imbitado unta sa pagbukas sa duwa si Vice President Sara Z. Duterte  apan si DepEd-7 Regional Sports Officer Tomas Pastor mibutyag sa The Freeman, igsuong pamantalaan sa Banat News  nga dili kini makatambong tungod sa mas importanteng mga trabaho.

Hinuon mipadala si Duterte og representante nga si Assistant Secretary for Operations and Palarong Pambansa Secretary Francis Cesar Bringas.

Si DepEd-7 Regional Director Salustiano Jimenez kauban ang ubang regional officials ug superintendents gikan sa 20 divisions ug mga opisyales sa gobiyerno maoy diha sa pagbukas sa duwa.

Sila si Cebu Governor Gwendolyn Garcia ug Carcar City Mayor Patricio Barcenas maoy mga nitambong sa habig sa mga lokal nga opisyales sa probinsya nga gisugdan alas 4 na sa hapon kagahapon.

Ang Carcar City Sinulog sa Kabataan 2023 ug Sinulog sa Carmen 2023 champion maoy milingaw sa mga bisita pinaagi sa ilang presentasyon.

Gibanabanang dul-an otso mil ka mga delegado gikan sa Central Visayas ang gipaabot nga magdugok sa maong siyudad suds a usa ka semana.

Ang 6,525 niini mao ang mga atleta, ug 1,146 ang mga coaches ug 147 assistant coaches samtang 111 chaperones.

Gawas nila, dunay 332 ka delegado gikan sa Special Education ang gikatakda sab nga moduwa.

Karong adlawa, Lunes, gipaabot nga mag full blast na ang kompetisyon diha sa maong siyudad, apan sa Naga City himuon ang badminton.

Ang ubang tennis matches anha duwaon sa Sangat Court sa San Fernando samtang ang artistic and rhythmic gymnastics anha buhaton sa Gymnastics Academy sa Labangon, Cebu City.

Ang mga mananaog nga atleta sa CVIRAA Meet karon maoy makasalmot sa Palarong Pambansa sa Marikina City tungatunga ning tuiga, ang uban nila moagi pa og cluster meet ayha pa makasulod sa finals. —The Freeman