Maayo ang dili magpa-cremate

Adunay magsuon nga gustong bahinbahinon ang abo sa gi-cremate nilang igsuon.

Nangutana sa higala kong cantor, kinsa nangayo sa akong panahom kon okay ra ba kuno?

Akong giingnan: “Dili na okay, Sis! Wala kana itugot sa atong simbahang Katoliko.

Sagrado ang lawas sa tawo. Kinahanglang irespeto ug ilubong sa usa ka permanenting balaang dapit sama sa menteryo, simbahan o kolumbariyo.”

Tinuoray, dugay nang gitugot sa Katolikong Simbahan ang pag-cremate sa minatay. Pero gikahon kini sa pipila ka lagda: 1) Gidili ang pagtener niinig dugay sa balay. 2) Gidili ang pagsabwag sa abo didto sa kadagatan, kaumahan o ubang dapit. 3) Labaw nang gidili ang pagbahinbahin sa abo aron dad-on sa lainglaing dapit o himuong sagol sa bisan unsang personal nga katuyoan. 4) Kinahanglan ang urna sa abo ilubong gayod sumala sa nahisgotan na sa unahan.

Sa Bibliya, walay bersong magtumbok, diin ang pag-cremate sa patay, usa ka sala.

Hinungdan, miuyon atong simbahan sa cremation, ilabi na sa delikadong higayon, diin ang lawas sa minatay daling makapanakod og daghan.

Gumikan niini, daghang lainlaig tinuohan ang mitugot nga ang abo sa minatay, papuy-on sa panimalay, isabwag sa dagat o bisan asa, mahimo rang bahinbahinon sa mga kadugo aron may gamayng tipik nga ikasulod sa pendant, itempla sa pulbora nga himuonong bala ug uban pang buhat nga nasukwahi sa gipraktis sa Katoliko.

Ang pangutana, girespeto pa ba ang kasagrado sa lawas sa patay? Gani, niadtong bata pa ko, mahadlok gyod mi makatunob og lubong sa mga patay. Kon makayatak, mangayo dayon mig pasaylo.

Ingon niini kataas ang respeto namo ngadto sa mga patay, nga maoy gitudlo sa among mga katigulangan.

Husto silang miingon: “Giumol ang tawo sa Ginoo gikan sa abog ug mobalik ra usab sa abog inig kamatay. Pero angay hinumdoman: ‘Gidili Niya ang pag-usab sa unsay hitsura sa Iyang giumol. Kon kita, tawo, gikan sa abog.

Dan, Siya ra poy makapahibalik nato sa pagka-abog. Nungkang tawo maoy mosunog-cremate sa patay’ng lawas aron dali kining ma-abog.

Kini maoy nakapalig-on sa pagtuo, nga mas balaanong ilubong ang patay nga dili i-cremate subay sa naandang pamaagi sa Katolikong simbahan. Mas nindot sundon ang Ginoo, kay sa tawo.