I-angan angan lang una ang pagparehistro

Madungog nato kanunay kaniadto ang Commission on Election kon Comelec ang awhag nila sa mga tawo nga mosayo sa pagparehistro.

Kini aron malikayan nga magdasok inig abot sa deadline sa voter’s registration diin mao naman gyud ang nabatasan sa mga tawo nga molihok inig ka eleventh hour na.

Apan karon bali na ang awhag sa Comelec kay matud pa ni Atty. Lionel Marco Castillano, Provincial Election Supervisor, mahimo ra gyud iangan-angan ang pagparehistro karon aron dili magkaproblema gumikan sa nasinating pandemya.

Nasayran nga magpadayon gyud ang voter’s registration human mihukom ang Comelec en banc pagpadaplin sa hangyo sa ubang sektor nga ihunong lang una ang registration ug sa Enero sa sunod tuig ipadayon.

Nagpasabot nga padayon ang kalihokan sa naasoy’ng buhatan apan gihigpitan nila ang ilang sestema.

Lakip niini ang online appointment sa mga gustong mo-transact o nagparehistro aron ma-schedule kinsa ug pila ka mga tawo ang ilang ma accommodate nianang adlawa.

Kong tugotan ang walk-in mahulog sa walay kapuslanan ang online kay magsalig naman unya ang mga tawo nga pwede ra diay.

Sa mga dakbayan sa Sugbo ug Lapu-Lapu walay katakos ang mga Comelec offices sa physical distancing kay wala silay kaugalingon nga luna nga kapahilunaan sa mga tawo.

Gani dunay adlaw nga magpunsisok gyud ang mga tawo nga delikado dili lang sa mga taglawas kondili apil na sa mga kawani nga posibleng mataptan sa virus.

Sakto ang awhag sa Comelec official nga kon dili gyud gikinahanglan dili lang sa gyud moadto sa ilang buhatan hangtod molurang ang COVID-19 case.

Pastilan sa dakbayan sa Sugbo lang daghan ra ba gyud mga senior citizens ang gapanon sa Comelec kay magparehistro, ang uban transfer of registration gikan sa sa ubang dapit.

Dili man hinuon tanan pero kasagaran nag-apas sa benepisyo nga ihatag sa syudad, aw ayaw lang sa na isugal ang inyong kinabuhi ana kay delikado kaayo sa inyong edad kon mataptan sa kagaw.

Sakto ang Comelec nga makahuwat pa na ang registration usa man ni ka tuig pwede ra gyud maglangay langay sa pagparehistro, ayaha lang kong naa nay bakuna.

 Mas importante ang safety karong panahona.