Kabus

Dunay mga higayon nga nangindahay kita aron mamahimong mga dato kun adunahan. Kay alang kanato ang kaadunahan maoy sukaranan sa respeto kun pagtahud gikan sa kadaghanan. Alang kanato usa ka dakong tunglo ang pagkakabus. Kini ang panlantaw sa kalibutan.

Apan sa panlantaw sa atong Kristo ang kakabus usa man ka requirement sa pagsulod sa gingharian sa langit. Kay alang niya, bulahan ang mga kabus kay ila ang gingharian sa langit! Bulahan ang gigutom kay sila pagabusgon! Ug uban pang mga panaad gikan sa atong giila nga Ginoo.

Ang kakabus sa tinud-anay lang maoy nipahigmata kanato sa buhing kamatuoran nga tanan nga atong nahuptan dili diay ato. Bisan gani ang atong kinabuhi dili man ato. Ang atong mga kaantigohan dili pud nato maisip nga ato. Ang tanan ato mang hinulman ug mahimong gamiton lamang samtang nia pa ta sa kalibutan apan moabot ang panahon nga silang tanan ato namang biyaan. Nga sa ato pa dili maayo nga magpalabi ta sa atong gibati  kay ang tanan mahimo ra gyud nga walay kapuslanan.

Ang pag-angkon nga kita kabus mao man ang nakapahimo natong mapaubsanon ug manggihatagon. Mapaubsanon tungod kay giangkon man nato nga tungod sa grasyang Diosnon kita gihatagan og kahigayonan nga mo enjoy sa bisan unsa nga gihatag.

Ug kun buot hunahunaon tungod sa atong kahuyangan ug mga kalapasan dili gyud unta kita angayan. Apan ang grasya nilihok nga tungod niini nahatagan kita sa maong gasa. Ang maong gasa materyal man o dili mao unta ang magdapit nato sa pagpakita sa atong dakong kamapasalamaton.

Ang bugtong paagi sa pagpakita sa pagkamapasalamaton mao man ang pagkamanggihatagon. Ang bisan unsa nga nadawat dili lang maayo nga tipigan. Ang tanan gamiton sa hustong pagkagamit aron mabulahan ang tanan. Kay walay dato nga wala magkinahanglan ug walay kabus nga walay ikahatag.

“Hinumdomi tawo nga sa abog ka gikan ug sa abog ka pauli!” busa ayaw palabi sa imong gibati. Diha lamang sa pagpaubos mamahimong tunhay ug malinawon ang imong panaw sa kinabuhi. Kay pagtulon sa walay hinungdang garbo dili man makapatambok kanato.

Paagi usab sa pagpadayag sa imong pagpaubos mao ang pag-angkon nga kun wala kay alamag sa trabaho kun posisyon kanimo tungod kay lain sa imong naandang buhat diin ikaw hanas nan, ayaw na lang og patuga tuga. Kay makadaut ka ug makahatag ka og kadaut usab sa uban.