EDITORYAL — Serbisyo dili negosyo

Daghang nalipay nga mga pasahero aning libreng pagkaon diha sa South Bus Terminal ug North Bus Terminal nga gidalit sa Kapitolyo karong panahon sa Kalag-Kalag. Serbisyong tinuoray ug dili negosyo.

Pinaka-una kini sukad sa kasaysayan sa lalawigan nga gipakaon og libre ang mga mobiyahe pauli sa mga lagyong lungsod sa probinsya ug posibleng hasta ang mga taga Isla sa Negros ug ubang kasikbit nga probinsya nalibre pud.

Maayo nalang na para sa mga pasaherong daginuton kaayo ang budget sa ilang pagpauli. Kay naa gyud posibilidad nga dunay mga pasaherong ang kwarta igo rang pamelete pauli ug wala nay pangkaon ug pang-inom og tubig sa biyahe.

Kaning nahunahunaan sa Kapitolyo dako na kaayo ning tabang sa mga sumasakay para sa ilang menus gastos apan maayo ug luwas nga pagbiyahe pauli sa ilaha para sa kalag-kalag.

Gawas sa hugot nga seguridad ug hapsay nga sistema sa pagpalit og tiket, pagsakay sa mga pasahero ngadto sa mga bus, surpresang drug test sa mga drayber ug konduktor ug uban pa, nalipay pud ang mga operators aning temporaryong pagkanselar sa pagbayad og terminal fees.

Pero dili man kini makapayabo sa panudlanan sa lalawigan kun dunay mga okasyon nga dili nila pabayron og terminal fees ang mga bus sama aning kalag-kalag, pwede gani nila kini buhaton pag-usab karong Pasko.

Pinaagi ani, mas ganahan na silang mosulod aron mo-pickup og pasahero diha sa terminals. Kung buot hunahunaon, kaning mga terminals, usa ni sa maka-generate og kwarta para pangpundo sa Kapitolyo.

Kay bisan og dili maningil ang lalawigan og terminal fees anang mga adlawa, naa man gihapon kini kitaon gikan sa ubang mga nag-negosyo diha sa sulod sa terminal, di man tuod dako, pero ang tumong baya sa gobiyerno—serbisyo man, dili negosyo.

Maayo kining sundugon sa ubang mga LGUs o mga lalawigan para pud mabati sa ilang mga konstituwente ang tinuoray nga serbisyo sa ilang gobiyerno.