Kabus pa sa gitawag nga kakha-tuka

Unsa ang kalisod alang sa mga tawo nga daan nang nag ilaid sa kalisdanan? Mao kini ang akong gisusi mismo sa hut-ong sa mga tawo sa dakbayan sa Sugbo kansang kapalaran nahiapil sa gitawag nga kakha-tuka o isang kahig isang tuka sa tinagalog pa.

Mas labaw pa gani sa kakha-tuka ang ilang kahimtang kay dili man sila makakakha karon kay nahunong man ang ilang mga panginabuhian ug nagsalig nalang sa ginagmayng ayuda sa mga nagpakabana.

Sama nalang niining mga tawo nga nagpuyo sa daplin sa karsada diha dapit sa may pantalan sa dakbayan sa Sugbo.

Dili gani matawag nga barong barong ang ilang mga gipuy-an kay hilabihan man gyud ka gagmay nga daw maguwang lang gamay sa pati diin kadtong mga bata lang seguro ang masulod.

Ubay-ubay sila nga mga nagpuyo sa dapit diin gikoral nila gamit ang mga tinapaktapak nga mga kaso aron kuno dili makagawas ang ilang mga anak dili lang tungod sa kahadlok sa madakpan sa mga sakop sa SAF nga nagpatrolya kon dili mahadlok sila nga maligsan sa mga dagkong sakyanan.

Walay kuryente diin makita ang mga kinaraan nga pamaagi sa pagpuyo nila, ang ilang pagluto sa kahoy pa nga typical sa probinsya nga makita.

Apan karon nga wala na makatrabaho ang mga tawo nagpaabot nalang sila sa ayuda sa kagamhanan aron makasugakod.

Bisan og ingon niini ka miserable ang ilang kahimtang nakita nako sa ilang mga dagway ang kagaan sa kabubot-on nga daw kontento na sila sa ilang kinabuhi.

Kong ang uban nagsige og bagutbot sa ilang reklamo batok sa gobiyerno, sila lahi kay mipakita sila sa ilang suporta sa mga nagdumala karon sa nasud uban sa paglaum nga makatabang kini sa pagpabalik sa normal nga sitwasyon pinaagi sa malamposon unya nga pagbuntog sa coronavirus.

Nakaingon ko sa akong kaugalingon nga giunsa nila sa pagpagaan sa ilang gibati nga lisod man gyud kaayo tan-awon ang ilang kahimtang. Seguro tungod kay naanad na sila sa kalisod busa napul-an na sa kalisdanan maong kaya ra kaayo nila ang nahiaguman nga kalisod.

Advantage diay alang sa mga naanad na sa kalisod kay dili na sila maglisod sa pag-adjust kay mao naman ang ilang naandan  nga usahay makakaon ug uhasay dili.

Sila ang angayan nga hatagan og pagtagad sa gobiyerno kay klaro kaayo silang tabangonon bisan og piyongan pa makita gyud ang kalisdanan.