Nganong uwahi na ang tanan
Posibleng mga hinungdan nganong ang Dakbayan sa Sugbo maoy kinatas-an og positivity rate sa COVID-19 (33 ang positibo sa matag 100 nga nakuhaan og swab samples) di lang sa tibuok Sugbo, di lang sa tibuok Kabisay-an, kon dili sa tibuok gyong Pilipinas:
Ang gipaubos og swab testing mao ra ang close contacts sa mga nataptan sa COVID-19 nga nasubay sa contact tracing sa Cebu City Health Department (CCHD);
May close contacts gani nga, kay wa man mopakita og mga timaan sa sakit, gilaktawan sa pagpangolekta sa swab samples ug igo lang gitambagan nga mag-home quarantine;
* * *
May mga molupyo sab nga, bisan gisip-on o giubo o gihilantan na, gitambagan lang nga mopahuway sa ilang panimay kay nahutdan og test kits ang CCHD;
May swab samples sab nga, bisan nakolekta na, natanggong sa mga laboratoryo sud sa pila ka semana tungod sa kakuwang sa reagents o kakulian sa mga makina o kakuwang sa health workers; ug
May PCR tests sa pribadong mga tambalanan nga bisan positibo ang resulta wa ipha sa Department of Health (DOH) kay di pa accredited sa Research Institute for Tropical Medicine (RITM).
* * *
Tungod sa kapakyas sa Dakbayan sa Sugbo paghimo og mas lapad nga COVID-19 testing, wa matultoli dayon ang mga dapit nga nagsugod nang tinakdanay.
Maong nagkara-kara ang CCHD kay uwahi nang nabantayan ang mga sitio o mga barangay nga daghan nang natakdan.
Mao ni hinungdan nga human sa kapin na sa gatos ka adlaw nga pagtanggong sa mga molupyo sa kabalayan wa pa gihapon nabadlong ug gani mas nipaspas pa ang pagsulbong sa mga kaso.
* * *
Mas makapa-alarma nga pangutana: Kon kuwang ang COVID-19 testing sa Dakbayan sa Sugbo nga may 50,000 ka test kits niadtong Marso, unsa na kaha ang ubang dakbayan ug kalungsoran nga wa gyod kapalit og bisan usa na lang ka PCR test kit?
Nabalaka ang mga mananambal nga ang pagdaghan sa mga pasyente sa Sugbo nga nangamatay sa COVID-19 sud lang sa 48 ka takna human nasud sa mga tambalanan maoy timaan nga ang kapakyas sa testing maoy hinungdan nga wa dayon matambali ang mga masakiton hangtod nga nigrabe na pag-ayong ilang kahimtang.
* * *
- Latest
