EDITORYAL - Pagkaanugon sa tuig

Samtang masabtan ang kabalaka sa mga ginikanan sa kaluwasan sa ilang mga anak tungod niining coronavirus disease (COVID-19) ini og balik na sa klase sugod karong Agosto 24, 2020 apan dili tingali maayong magpagawong na lang ang tanan sa maong sakit.

Sa pagkakaron, gidiktaran sa COVID-19 ang kalihokan sa mga tawo tungod kay daghang limitasyon sama na lang sa social distancing, pagsuot kanunay og facemask, pagpundo sa balay kung dili importante ang tuyo sa gawas ug daghan pang uban.

Tungod sab sa maong sakit, kinahanglang usbon sa DepEd ang pamaagi sa pagtudlo nga hangtud karon wala pay kongkretong plano kun unsaon ug kun haom o makaapas ba ang mga bata ug ilang ginikanan.

Dili mahimong dili mo-adjust ang katawhan niining new normal nga epekto sa COVID-19 tungod kinahanglang magpadayon sa pagpakabuhi ug paglambo.

Samtang wala pay epektibong bakunang pangkontra sa maong sakit, kinahanglan lang gyud nga magdoble sa pag-amping ang katawhan ug ang mga tinun-an kun pananglitan adunay higayon sa ilang pagtuon nga kinahanglan silang mag face to face uban sa ilang magtutudlo.

Ang COVID-19 dunay gitudlo sa tawo nga kinahanglang sundon sa tanan, kining new normal. Sa pagkakaron  makonsiderar na nga way maayong pamatasan ang tawong dili magsuot og facemask atubangan sa ubang mga tawo, maapil kini unya sa maandan sa mga tinun-an sa pagbalik sa ilang pagtungha.

Makat-on sab ang mga bata nga dili magkompiyansa ug magkanunay na og paglimpyo sa ilang lawas ilabi na ilang mga kamot matagkaron ug unya tungod sa kabalakang makahikap sila og kontaminadong butang.

Hinuon, dili mapugos sa gobiyerno ang mga ginikanan kung dili gyud nila patunghaon ang ilang mga anak tungod sa kahadlok.

Kinahanglan lang sa DepEd mag-umol og sistema sa pagtungha nga makampante ang mga ginikanan aron way batang mabiyaan karong tuiga.

Apan pagkaanugon sa usa ka tuig kun magestambay lang ang mga bata, mas grabeng maapektahan niini ang mga kabataan sa mga kabus nga pamilya.