Kabanhawan sa Paglaum ug Pagtoo

Uban sa Pasko sa Pagkabanhaw sa atong Manunubos nga si Hesus ang paggitib usab sa bag-ong paglaum sa katawhan nga makabangon sa pangkalibutanong krisis nga kasamtangan natong giatubang.

Sa paghandom nato sa kasakit sa Ginoo niadtong nakalabay nga Semana Santa, nahinoklogan ba nato ang sakripisyo ni Hesus nga gilansang sa krus aron sa pagtubos kanato?

Seguro halos tanan nakabatyag sa kasakit sa Anak sa Dios, gani kitang tanan mibati sa kauhaw Niya dihang nagbitay siya sa Krus.

Giuhaw kita sa mga pulong sa Dios nga libre ra natong mabati ug makita sa kalihokan sa mga simbahan panahon sa Semana Santa, linawas nato nga makita ang pagpaambit sa pulong sa Ginoo.

Apan karon wala nato kini masinati tungod sa problema sa kagaw nga maoy naghulga sa kinabuhi sa katawhan. Pinaagi nalang sa cellphone o ba kaha sa TV ang pagtuman nato sa obligasyon nato nga pagpakaon sa atong kalag.

Dili lang ang lawas karon ang mibati og kagutom ug kauhaw. Mas labaw na ang atong kalag nga nahatagan lang nato og virtual food for the soul.

Sama ra sa imaginary food ang atong gitanyag sa atong kalag nga dili gyud makatambal sa kagutom kay inig ka balik na nato sa realidad salida ra diay sa TV o sa cellphone ang atong gitan-aw.

Gihatagan lang kita sa Ginoo sa atong gusto kay nagpaulipon na kitang tanan karon sa cellphone, iPad ug ubang technology nga mahimo ra gani nga dili makakaon basta magsige lang og Facebook.

Apan matag tan-aw nato sa atong newsfeed mobati na kita og kahadlok ug kabalaka tungod sa balita sa COVID-19 samot na nga naay daghang mga fake news nga mas makalilisang. Busa ang uban mahadlok na moukay sa facebook aron makabaton og peace of mind.

Karon mitiyabaw na ang katawhan sa epekto sa coronavirus pandemic, kagutom, kasakit ug kamatayon ang nagapanghitabo karon.

Kining tanan malusotan nato pinaagi sa pagbalik Kaniya nga maoy naglalang sa mga binuhat dinhi sa kalibotan.

Unta mosidlak ang paglaum inubanan sa paningkamot ug kooperasyon sa tanan, ma yanong tawo o opisyal sa gobierno.

Isalikway na kadtong naandan kaniadto nga sagolan og pamolitika o vested interest ang matag lihok o tabang tungod kay kitang tanan karon apektado niining balatian nga gikahadlokan.