Ugay sa ugayon, hikap sa hikapon

Sa pag-implementar unya sa Enhanced Community Quarantine sa kinatibuk-ang isla sa Sugbo sugon karong Lunes, Marso 30, 2020, daghang Sugbuanon ang naglaraw na kon unsa ilang buhaton arong mahimong produktibo ug dili bation og kalaay sa maong panahon. Adunay pagya ang atong mga katiguwangan sa sagad nga mahitabo sa panahon nga walay gimbuhaton: “Mag-ugay sa Ugayon, mohikap sa Hikapon.  Hala no!

Basta VIP, libyano

Adunay mihungaw karon nga kasayuran nga ubay-ubay na ang politiko ug mga opisyales sa kagamhanan apil ilang mga paryente ang nag-una-una sa pagpa-testing bisan gani kadtong walay mga sintomas sa corona virus.  Alang sa uban, garapalan na ang ilang pagpahimulos sa gahom.  Gani na-obserbahan nga libyano kaayo ang VIP makasuroy-suroy samtang ang ordinaryong si Juan buyagon/dakpon gilayon sa awtoridad kon molakaw bisan panginabuhi unta ang hinungdan.  Mao tingale nga daghan ang VIP nga positive sa COVID. Aw, Patas ra diay!

Way pagbasol nga mag-una

Ang pagpangayo og pasaylo ni Senator Koko Pimentel ngadto sa taga Makati Medical Center dili piho nga makahupay sa mga pagbati sa mga trabahante sa maong hospital, matud pa ni sa ilang Medical Director nga si Dr. Saturnino Javier.  Adunay mga resulta sa atong binuhatan nga di na mabakwi bisan sa labing sinsero nga pagpangyo og pasaylo.  Dili mobalik, hinonoa, padayon ang pagtuyok sa kalibutan taliwala sa atong kasaypanan.  “Wala’y pagbasol nga maga-una”, matud pa. Angay nga hinuklogan sa tanan!

Sagbot sa katilingban

Ginaingon nga ang pag-imponer sa Community Quarantine sa nangagi’ng mga adlaw, nakapakunhod sa gidaghanon sa basura nga nakolekta sa Department of Public Services (DPS) ingon man sa gidaghanon sa krimen nga nahitabo sa siyudad sa Sugbo. 

Nahitabo ba lang kaha nga daw managsama ang kalidad sa mga nikunhod nga panghitabo?  Kay ang basura ingon man ang krimen ug mga kriminal matawag ta man nga pulos “sagbot sa katilingban”.  Baya no?