Mopatigbabaw ang interest sa tanan

Hilabahin ka kasuko ang gibati sa mga tawo nga gikan o niagi lang sa Taiwan kinsa gikorentinas sa pasilidad sa lalawigan sa Sugbo.

Gani naglisod gyud ang mga ahensya sa pagkombinser niining mga tawhana tungod sa ilang resisrtance nga i quarantine.

Naa gani ang mihulga nga ikiha ang nagpasiugda niini diin an nabuthan mao ang provincial government.

Apan in fairness sa probinsya igo ra man kining mipatuman sa derektiba sa Malacanag pinaagi sa Department of Health.

Reklamo nila nga dili maayo ang ilang gipoy-an kay wala kunoy tubig ug gisaway nila ang pasilidad.

Makasabot kita sa ilang gibati tungod kay dili lalim nga tanggongon sa pasilidad sulod sa 14 ka adlaw.

Pero angayan man pud nilang tan-awon ang kaayohan nga mamugna niini sa tanan aron maseguro gyud nga dili makakuyanap ang virus busa kinahanglan nga i-quarantine sila.

Basin diay usa sa ilang pamilya ang maluwas sa gihimo sa gobierno karon, mas maayong segurista kita niining panahona kay dili ra ba gyud makita ang atong kontra.

Sa kadtong nhulga nga mopasaka og kasong illegal detention, murag tungason kaayo nga molampos ang kaso tungod kay ang nagbuot niini mao ang gobierno.

Gipadayag sa mga opisyal nga mas mopatigbabaw ang interest ug pagpanalipod sa mga tawo batok sa Coronavirus.

Hinoon mipasalig ang lgu ug ang DOH atimanon ang mga tawo nga naka quarantine, dili man ingon niana ka kaharuhay apan nahatagan sila og kapasilongan.

Ning adlaw sa gugma ipatigbabaw ang pagsinabtanay dili ipatigbabaw ang kasuko kay gihimo lang sa atong gobierno kon unsa ang makaayo.