EDITORYAL - Virus sa messenger?

Niadtong naghinangat ang Pasko ug Bag-ong Tuig, daghang mga gipasa-pasang mga Christmas ug New Year Greetings diha sa Messenger. Tungod kay ang nagpadala kaila man sa gipadad-an giablihan kini sa pagtuong tinuod kini. Maayo kaayo ang pagtimbaya sa mga kahigalaan, minahal sa kinabuhi ug mga kaila sa bisan unsang medium o pamaagi. Ug usa sa social media sa labing paspas nga pamaagi karon tungod sa messenger ug daghan pang uban.

Apan usa ka computer emergency response team nga gitawag og Cyber Security Philippines-CERT mipasidaan niadto lang adlaw nga Lunes nga magbantay ug dili pataka og abli og mga greetings messages kun kini gipaagi og application kon apps.

Ang maong mensaheng gigamitan og apps giingong gikan sa mga ‘malicious websites.’ Kani nga websites giingong mopahimangno kunohay sa user nga ipausab ang mga impormasyon sa iyang account niini tungod kay na-hack kini. Apan ilad diay kadton aron lang sila maka-access sa account sa ilang biktimahon.

Ang CSP-CERT miingon nga dili pataka og abli sa mga greeting messages kun kini gikan sa mga websites nga http://wish-you.co http://wish4u.co; https://my-msg.co; http://look-me.co; http://surprise4u.me; http://hookupgist.com; http://see-magic.co; http://mera-style.com; http://whatsapp-style.co; ug http://my-love.co.

Hinuon, ang mabiktima lang niining mga modus mao lang kadtong mga nigamit sa ilang mga cellphones ug computers sa ilang online transactions gikan sa bangko ug ilang mga negosyo.

Sa ato pa, kwartang gipaagi sa online transactions ang ilang tuyo. Nagpasabot nga dili tanang aksidenteng makaabli aning maong mga mensahe ma-hack gyud ang account. Kay unsa may kawaton gikan kanila kun ang gamit sa ilang cellphones pangtawag, pang-text, messaging, Facebook ug online games ra?

Samtang tuod maayo nga dunay CSP-CERT isip labing unang rehistradong computer emergency response team dinhi sa Pilipinas nga nag-monitor, nagtuon ug mosulbad sa mga problemang dala sa cybersecurity,  ang numero unong kinahanglang magbantay mao mismo ang mga netizens nga makadawat aning mga mensahe.