Pakyas mao nga gipalayas

Tungod sa ginaingon nga kapakyas nila sa pagsulbad sa kakulang sa supply sa tubig, gitaktak ni Mayor Edgar Labella ang unom ka sakop sa MCWD Board. Kon ugaling magmagahi ang hingtungdan nga mga miyembro sa MCWD Board sa pagkanaog, hayan adunay hataas nga panagbangi nga legal ang atong masaksihan.  Niining higayona, ang tubig nga mapaabot sa katawhan mao lamang unya ang laway nga mogawas sa baba sa matag habig panahon unya sa ilang paglantugi kon kinsay sakto tali kanila.  Faeetz!

Problema nasayran na, solusyon wa pa, part 1

Atol sa usa ka session sa Cebu Provincial Board, gideklarar sa Sangguniang Panlalawigan, pinaagi sa resolusyon nga gipangamahanan ni Bokal Glen Soco, nga aduna na’y ‘traffic crisis’ dinhi sa Sugbo.  Sayod na ang tanang Sugbuanon sa maong krisis apan dugay ang pag-angkon ug pagtagad sa kagamhanan niini.  Labaw pa unya nga mas dugay ang pagbuhat sa solusyon alang sa kasulbaran sa maong suliran.  Agwanta ta pa more!

Problema nasayran na, solusyon wa pa, part 2

Sa susamang kalambuan, gitumbok nga ang ‘truck ban’ nga giimplementar sa Dakbayan sa Mandaue usa sa hinungdan nga adunay trapik sa amihanang bahin sa Sugbu.  Nahibaw-an na diay ang hinungdan sa trapiko sa maong lugar; ang wala masayri mao na lang ang solusyon sa maong suliran.  Aw, padayon lang una ang kahuot sa trapik!

“Killing me softly”

Mihangyo ang Konseho sa dakbayan sa Sugbo kang Mayor Edgar Labella nga dili gilayon mohatag ug permit alang sa pagputol sa kahoy ngadto sa DPWH hangtud nga matataw kon unsa ang ilang sagupon nga mga ‘mitigating measures’ aron sa pagpreserbar sa kahimtang sa kalikupan.  Karon pa ko mahibalo nga ang pagputol ug kahoy o ang pag-guba sa kinaiyahan mahimo diay nga ma-mitigate o makunhuran. Daw sama kini sa linya sa aw it nga nagkanayon: “Killing me Softly”!

Patas lang unta

Usa ka Kongresista mipadayag sa kamahinungdanon sa pagpasar sa balaod nga manalipod sa mga ‘wistleblowers’ o mga tawo nga andam motug-an sa ilang nahibaw-an sa nahitabong korapsyon sa ilang lugar. Kon mapasar ang maong balaod, kuyaw kon modaghan usab ang mga bakakon. Hinaut magpanday usab sila’g balaod nga manalipod sa katawhan sa mga pagtumo-tumo. Kinahanglan nga patas!