Salapi ang nagpaluyo?

Nakugang ang mga Sugboanon sa dihang napamatud-an nga nakagawas na gikan sa National Bilibid Prison (NBP) ang pipila ka konbiktado sa pagdagit, paglugos ug pagpatay sa managsuong Marijoy ug Jacquiline Chiong dinhi sa Cebu.

Gani gikonpirma kini mismo sa hepe sa Bureau of Corrections nga si Nicanor Faeldon atol sa Senate hearing sa niaging adlaw nga nag-inquire sa kontrobersiya nga gikalambigitan sa mga piniriso, ilabina niadtong mga heinous crime convicts, nga gihatagan og kagawasan tungod sa ilang pagbinut-an.

Silang Josman Aznar, Alberto Allan Caño ug Ariel Balansag, ang tulo sa mga konbiktado sa Chiong case, gipagawas gikan sa NBP sa niaging bulan human sa 20 ka tuig nga pagkabilanggo ilalum sa Good Conduct Time Allowance (GCTA) Law.

Haska intawon kisikisi ni Thelma Chiong, ang inahan sa mga biktima. Matud niya nga dili gayud angay nga makagawas ang maong mga konbiktado tungod kay gisilotan na man gani sila og kamatayon sa korte.

Hinuon makasimpatiya lamang usab kita sa pamilyang Chiong gumikan niining dakong kalamboan sa maong kaso.

Morag bag-o lamang nasilotan kadtong mga konbiktado apan takulahaw lamang nga nakagawas tungod sa maong GCTA Law.

Daghan ang nagtuo nga madugta gayud sa bilanggoan ang maong mga konbiktado gumikan lagi kay heinous crime man ang ilang nakomiter: kidnapping, rape ug murder, krimen nga nagtangag og silot kamatayon.

Hinuon dili lamang ang mga Chiong convicts ang benepisaryo sa maong GCTA Law. Daghang mga konbiktado sa mga linuog nga krimen ang gikataho nga nakagawas na gikan sa NBP.

Gani hapit na gayud unta makagawas sa prisohan si kanhi Calauan, Laguna mayor Antonio Sanchez kinsa konbiktdo usab sa heinous crime

Daghan hinuon ang nakatimaho nga adunay salapi nga nagpaluyo sa kagawasan niining mga konbiktado ilalum kuno sa GCTA Law.

Angay lamang nga mohimo og dinaliang imbestigasyon ang kagamhanan niining maong dakong kontrobersiya.

Dako kini nga sagpa sa kasagrado sa hustisya sa nasud.