EDITORYAL - Matago ang kurapsyon

Sa pagpanerbisyo isip usa ka public official, elected official o bisan gani yanong kawani sa gobiyerno gikinahanglan gyud nga sila matinud-anon ngadto sa publiko ug sa ilang gipanumpaang panaad.

Apan dili kalikayan nga nagtangag kini kanunay og mga pagduda nga sila kurakot ug mga kawatan bisan paman dili tinuod. Apan unsaon man kaha pagpamatuod nga sila nangurakot kun maayo silang motago sa ilang kwarta diha sa mga bangko?

Pagkakaron kun ang usa ka public officials nakasohan tungod sa kurapsyon lisud kaayong pamatud-an kay dili man basta malili ang iyang mga bank accounts ug sa ilang miyembro sa ilang pamilya kun walay mando gikan sa korte tungod sa Bank Secrecy Law nga nahimong balaod sukad pa niadtong dekada 50.

Gani bisan og may mando na sa korte, kun ang public official konektado o kaalyado sa administrasyon, lisod gani kaayong mosanong ang  mga bangko kay daghan pang mga legal nga prosesong ang remedyo hangtud maabtan nalang sa sunod nga eleksyon di pa gyud makombikto.

Maayo kining giduso nga balaudnon sa beteranong senador nga si Senador Panfilo Lacson nga Senate Bill 26 nga mag-exempt sa tanang public officials ug empleyado sa gobiyerno sa proteksyon gikan sa Bank Secrecy Law.

Gikan sa presidente hangtud na sa kinaubsang kawani sa gobiyerno dili mahimong makaikyas sa pagutingkay sa ilang bank accounts kun sila gipaubos sa imbestigasyon.

Pila naman ka mga public officials ug elected officials ang nakalingkawas ug nagpabilin sa pwesto tungod sa Bank Secrecy Law? Di na maihap. Gani ang uban kanila naglingkod pa gihapon karon sa pwesto. Usa kini ka pamaagi nga maputol na sab kining panglantaw kanunay sa publiko sa mga kawani sa gobiyerno nga sila mga kawatan ug kurakot tungod kay mahimo mang dihadiha malili ang ilang bahandi ug kwarta sa bangko.

Apan kaning balaudnon si Lacson siguradong babagan kini kutob sa mahimo sa mayoriya sa mga magbabalaod. Dili tungod kay kurakot sila kondili dili gyud sila gustong mahibaw-an kun unsa na sila kaadunahan.