Ingon ana ka simple

Sa unang higayon giangkon sa pangulo sa Partido Barug, Cebu City vice mayor-elect Michael Rama nga dunay panagbingkil sa mga sakop sa ilang partido. Wa niya itug-an kinsa ang nagkabingkil apan  wala malilong ang bangi nilang councilor-elect Niña Mabatid ug outgoing Councilor Pastor Alcover Jr. Gawas sa duha nga nagkainitay diha sa social media, posibling duna pay laing mga sakop ang dunay hilom nga disgusto sa usa’g usa. Ang tataw nga hinungdan sa panag-away sa duha ka sakop sa Partido Barug mao ang resulta sa miaging eleksiyon.

Si Alcover mibasol ni Mabatid sa iyang kapildihan tungod kay matud niya gibudhi-an siya niini diha sa Barangay Mabolo. Matud ni Alcover nga ika-14 lang siya sa Mabolo samtang si Mabatid nag-una sa tanang kandidato sa north district didto sa naasoy’ng barangay.

Kini maoy gipanghimug-atan ni Alcover nganong nagtuo siya nga gi-junk siya ni Mabatid. Si Mabatid mihimakak nga iyang gi-junk ang iyang mga kauban sa partido. Apan iyang giangkon nga duna siyay grupo sa solid niyang mga supporter nga siya ra maoy gibotaran.

Ila kuno kining paagi pag-alkontra sa gihimo nga pag-junk kang Mabatid diha sa sample ballot sa ilang partido. Nangangkon si Mabatid nga gitangtang ang iyang pangalan diha sa sample ballot sa ilang partido hinungdan nga ang iyang mga dumadapig mihimo og single voting.

Way kalainan ang single voting ug junking. Pareha ra ang epekto niini. Kun imong gimandoan ang imong mga supporter nga ikaw lang ang botaran og wala nay lain, nagpasabot ni nga imong gi-junk ang imong mga kauban.

Simple kaayo na nga sabton. Apan isip tang-an sa politika, dili angayang moreklamo si Alcover niini. Nasayod siya nga mahitabo gyud ni sa eleksiyon tungod kay mismo ang ilang mga kauban sa partido ilang kontra. Ug dili ko motuo nga sa iyang kadugay na sa politika wala siya mohimo niini.

Dunay punto si Mabatid nga ang angayang buhaton ni Alcover mao ang pagdawat sa iyang kaparotan. Bisan pa og midaog siya sa Mabolo dili gihapon modaog si Alcover sa kinatibuk-an tungod kay basi sa resulta ika-13 ra siya sa 34 ka mga barangay sa north district.

Normal hinuon ni sa eleksiyon sa Pilipinas nga sagad sa  mga pildiro mangita gyud og mabasol sa ilang gidangatan. Kun dili mamasangil nga gitikasan sa kontra, mamasangil sa kauban nga gibudhian. Apan ang lintunganay niining tanan mao nga wala na makauyon ang mga botante niya hinungdan nga siya napildi. Ingon ana lang ka simple!