Did you vote wisely?

Karon, tapus na ang eleksyon, mobalik na usab kita sa atong pagka-ulipon sa mga tawo nga atong gibutang sa gahum sugod gahapon. Hukasan na usab kita sa korona sa atong pagka-hari kay sila nga atong gituboy sa kadaugan mobanus na usab sa pagka-hari.

Kahibawo man ta nga kining atong pagka-haring lungsod panahon ra man sa eleksyon, ug during the campaign period lang. Ah, yes, did you vote wisely? Kun nagpasagad lang gihapon ka sa imong pagbotar, dimalas ka. Mag-antos na usab ikaw sa mosunod nga tulo ka tuig. Maghuwat sa laing eleksyon, kun duna man.

Sa akong bahin, I voted wisely. Apan, kun mangapilde ang akong gobutohan, dimalas tang duha.

By the way, wa ko maglisud ug wa ko mahasul sa akong pagbotar gahapon, dili sama sa  nangaging mga eleksyon nga nagtuyok-tuyok ko sa campus sa Guadalupe Elementary school pagpangita sa akong ngalan ug sa akong presinto.

 Viernes, upat ka adlaw una mag-eleksyon, nangutana ko sa Barangay kon duna na ba silay advanced copy sa voters list gikan sa Comelec.

Duna kuno, apan, walay ngan nako. Pagka-Sabado, miadto ko sa buhatan sa Comelec, ug gihatagan ko sa akong precinct no., cluster no. Hayahay kaayo. Dayun nakong uli, mihapit ko sa eskwelahan ug didto gi-post naman ang mga ngalan ug akong natultolan ang akong room.  On election day, diretso-diretso na lang ko sa akong kwarto. Unya, senior citizen man, dali ra kaayo kong nakabotar, samtang daghan pa kaayo ang naglibutlbot sa compound sa tunghaan nangita sa ilang mga presinto ug sa ilang mga ngalan.

Ug niadtong nakatultol na, taas kaayo ang mga linya. Ang pagdagsang ug paghuot sa mga electorate naghulagway sa atong pagka-mabuot nga lungsoranon, pagtuman sa kaakohan sa balaang katungod pagpili.

Daghan kaayong mga senior citizen, ang uban nag-wheelchair na, samtang ang uban giagak sa ilang mga kabanay. Ingon niini kainit ang ilang pagpakabana ug pagpanginlabot sa lungsudnong  obligasyon pagbotar.

Ug karon, back to work na ta. Ato nang ipadaplin ang politika kay mao kini ang nakaamong sa atong mga pagpanikaysikay ug pagpagningkamot nga mouswag ang atong pagpuyo.

Locally, sa atong lalawigan ug mga dakbayan ug kalungsoran, regardless kinsay mogulang mananaug, hinaut nga ang ilang pag-alagad dili ibasi sa bulok sa politika aron kalikayan ang ang mga nanghitabo sa unang panahon nga dili gayud magkasabut ug magkauyon ang atong gipiling mga public servants. .

So, ang nahitabo sumaa sa atong nasinati dinhi sa dakbayan and perhaps sa uban usab nga LGUs,  lantogi dinhi, lantogi didto;  babag dinhi, babag didto. Ambut nganong dili man sila magkasabot nga pulos man unta  sila mga alagad sa lungsod nga kaayohan sa kadaghanan maoy gilantaw. Mao nga sulod sa niaging tulo ka tuig, nahimong hostage ang mga lungsoranon. 

Ka-dakung dimalas. Hinaut nga dili kini masubli karong mosunod nga tulo ka tuig. Nga dili kita nila paantuson ug silotan as if kita ang sad-an.  Kinahanglan ilang tahuron ang desisyon sa katawhan. Mahimo nga they did not vote wisely, apan, mihukom na ang lungsod, ug ato kining dawaton ug respitohan.  Mag-usa na lang ta, alang sa kabulahanan natong tanan.  After all, milansar ka aron mualagad sa lungsod, di ba?