Himbisan ang mga kandidato

Panahon na usab karon sa pagpanghashas sa mga tawo nga baga kaayo og himbis, nga angayang panitan kon pwede lang. Daghan kaayo ang mga ingon niini, panahon sa tingpili sa mga tawo nga kunohay gustong moalagad sa katawhan, mga hipokrito.

Gisugdan na ang filing sa certificate of candidacy niadtong Sabado alang sa mga magpapili sa Sangguniang Kabataan ug Barangay elections sa umaabot nga eleksiyon karong Mayo 14. Apan bisan og wala pa gani ang election period, init naman kaayo ang kawa sa politika sa barangay.

Adunay mga incumbent barangay officials nga gisakyan ang tanang kalihokan sa barangay, apil na ang mga katalagman nga nahimong capital, aron makuha nila ang kasingkasing sa mga botante. Maayo kini nga pamaagi kay ang katawhan man ang mabulahan sa serbisyo nga nahatag kanila.

Apan ang uban nga mga incumbent, ilabi na kadtong mga kapitan nga kanunay lang wala sa ilang opisina sa barangay, ug lisud masakpan sa mga constituents kay mahadlok tingali mapangayoan og tabang. Atol sa kampanya moingon ang maong mga opisyal nga sayon ra sila duolon, apan kon anaa na sa pwesto, lisud na kaayo pangitaon kay motago naman.

Karon nga eleksiyon na usab, mogimaw na sab ang ulo niining mga tawhana nga ang mga nawong baga na kaayo og kubal aron mangilad na usab sa katawhan. Kitang mga botante, panahon na usab nato nga makabalos pinaagi sa pagsapsap sa himbis sa nawong niining mga tawhana.

Unta, dili nato usikan ang kahigayonan nga makapili kita og tinuod nga lider nga moserbisyo gayud kanatong katawhan.