Mga kahoy pangibton ra

Ang akong nahibaw-an nga dili man gyud kay pamutlon lang ang mga kahoy nga anaa sa mga center-islands, kon taliwala sa karsada, nga maapektohan sa pagpatuman sa Bus Rapid Transit (BRT).

Maninguha gayud ang kadagkoan sa kagamhanan nga hinayon kini sa pag-ibot aron ikabalhin pagtanom sa laing lugar. Unya, ngano man nga kining nangangkon nga mga environmentalist mosupak man dayon sa gitinguha sa kagamhanan?

Ang maayong buhaton sa mga nangangkon nga environmentalists, apil na ni Fr. Robert Reyes, mao nga motambong sila sa pagpahigayon sa public hearing didto sa Cebu City Council nga magtuki kabahin sa pagpatuman sa BRT project dinhi sa dakbayan.

Makapangutana ko sa mga nangangkong environmentalist kun ngano nga ang mga kahoy nga ilang gipanalipdan, kadto ra man nga ania mahimutang sa dakbayan sa Sugbo, ug kadtong anaa sa daplin sa karsada diha sa kalungsuran?

Wala ba diay sila makasuroy sa kabukiran nga ang katawhan nagpataka lang sa pagpamutol sa mga kahoy ug gihimo nila nga tabla aron gamiton sa pagtukod og panimalay? Kun tinuod man gyud kini sila nga environmentalist, mosuroy unta sila sa kabukiran ug manakop sa mga nagpataka lang pagpamutol og kahoy.

Unsa man diay ang atong palabihon, nga padak-on lang gyud ang maong mga kahoy diha sa taliwala ug daplin sa mga karsada bugti sa grabeng problema sa trapiko dinhi sa dakbayan? Ang BRT project nga gustong ipatuman ni Osmeña gitumong aron pag-iban, kun dili man gyud kini makasulbad sa grabeng problema sa trapiko.

Kinahanglan nga atol unya sa public hearing, ang mga nangangkong environmentalist motambong gyud ug mohatag og sugyot. Apan alang kanako, pangibton lang ang mga kahoy ug ibalhin sa pagtanom sa tukma nga mga dapit.

Ang nakadaot gud sa ubang mga opisyal kaniadto kay wala maglantaw nga sa umaabot nga katuigan, magkinahanglan nga palapdan ang atong mga karsada, mao nga gitamnan nila ang center-islands. Tan-awa, ang Imus Road diha sa Barangay Day-as ug Lorega-San Miguel, gitamnan sab nila og mga kahoy, ug lapad kaayo ang center-island.

Para nako, angay nga panipsan na kining mao nga lapad kaayong center-island sa Imus Road tungod kay ang maong karsada kanunay nga maghuot sa mga sakyanan. Ang nakadaot lang kay kun ang karsada lapad na, ang atong mga traffic personnel magmika lang usab ug dili makabadlong nga ang daplin sa karsada himoon na lang sa uban nga ilang parking area.

Ang problema sa trapiko dinhi sa dakbayan sa Sugbo ug ubang bahin sa Metro Cebu, angay na gyud nga hatagan og tukmang pagtagad, mao nga ako misulod pagka volunteer road law enforcer isip sakop sa Task Force Alpha.