Dili maayo nga ipaagi sa ATM

Mayo na sab, ikalima nga buwan sa tuig. Sigurado nga may mga senior citizens na usab nga magsige og pangutana kun kanus-a ipanghatag ang tag-usa ka libo ka pesos nga cash assistance gikan sa kagamhanan sa dakbayan.

Ambot, daghan man sa mga senior citizens nga dili lang maghuwat kun kanus-a ipanghatag ang ilang cash assistance gikan sa City Hall. Para kanako, mas nindot man gani nga tingubon bali og tulo ka buwan ang pagkolekta aron dako ang makubra.

Apan hinoon, para kanako, nindot usab nga kada buwan ang paghatag sa hinabang ngadto sa mga senior citizens aron nga kadtong tua magpuyo sa lagyong lugar, sama sa ubang probinsya, dili na ganahan moanhi aron pagkubra sa ilang hinabang.

Daghan kaayong senior citizens nga dia magparehistro sa Dakbayan sa Sugbo, apan tua sila magpuyo sa laing lugar. Kini maoy rason nga kada pagpanghatag sa cash assistance, dili gayud makolekta ang tanan.

Kun ang maong mga senior citizens dia pa magpuyo sa dakbayan sa Sugbo, imposible nga dili nila kuhaon ang P1,000 nga hinabang. Bisan pa og ibutang nimo nga tua sila nagpuyo sa Barangay Sudlon 2, nga labing layo nga barangay sa siyudad nga habig na sa Toledo, sayon ra gihapon ang pagkolekta kay ang mga taga City Hall moadto man sa ilang barangay.

Ibutang nato nga nasakit ang senior citizens ug dili makalakaw, ang mga kawani sa City Treasurer’s Office maoy moadto sa ilang panimalay basta magpahibalo lang. Apan kun tua sa ubang probinsya magpuyo ang mga senior citizens, alkanse sila kun moari kay subra pa sa P1,000 ang ilang magasto.

* * *

May sugyot ang ubang senior citizens nga ipaagi kuno sa Automated Teller Machines (ATM) ang paghatag sa ilang binuwan nga cash assistance. Dili gayud kini maayo ang maong sugyot ug mabentahaan niini ang kagamhanan sa dakbayan.

Kun ipaagi na sa ATM ang paghatag sa cash assistance sa mga senior citizens, mahimong wala na’y hasol alang sa mga kawani sa City Treasurer’s Office, Department of Social Welfare and Services (DSWS) ug Office of Senior Citizens Affairs (OSCA).

Apan ang dili maayo niini mao nga kadtong mga senior citizens nga tua na nagpuyo sa lagyong lugar, ilabi na sa mga milangyaw sa laing nasud, makahimo na pagkubra sa cash assistance bisan og wala na sila magpuyo dinhi.

Ang ilang buhaton mao nga mouli ra sila dinhi sa dakbayan kada piniliay aron sila makabotar ug dili matangtang ang ilang ngalan sa book of voters. Angay nga ang ilang ngalan tangtangon gikan sa listahan sa OSCA.