EDITORYAL - Na-improve ang Edukasyon?

Dako kaayo ang kalamboan nga nakab-ot sa mga tinun-ang Pilipino sa bag-ohay lang nahuman nga 2025 Programme for International Student Assessment (PISA) sa natad sa reading, mathematics ug science.

Kung itandi sa nakalabay nga PISA 2022 results, pwerteng layoa sa biya kay halos nabutang gyud sa ika-77 ang mga tinun-ang Pilipino gikan sa 81 ka mga partisipanteng nasud sa kalibotan.

Sa 2022 PISA ang mga Pilipinong tinun-an nakakuha og 355 points gikan sa 353 points sa 2018 sa mathematics.

Apan nikanaog gikan 356 ngadto sa 355 sa natad sa science. Sa reading lang kini nakakuha og dakong kalamboan gikan sa 340 sa tuig 2018 ngadto sa 347 sa tuig 2022.

Nakalayat ni og 17, 16 ug 20 points sa kada subject gikan sa resulta sa 2022 ug kadaghanan nakaabot sa PISA minimum proficiency benchmark.

Ang mga tinun-an nakaabot sa Level 2-o mas taas pa nga performance hangtud 32% sa science, 21% sa mathematics ug 31% sa reading.

Kung basihan ang pamaagi sa PISA, matawag lang nga dako ang kalamboan o pagtibugsok sa assessment kun moabot og 20 points.

Nabantayan hinuon sab Organization for Economic Co-operation and Development (OECD) ang kadako sa paglambo sa mga tinun-an sa Pilipinas ug giila kini nga fastest-improving participant in reading sud sa nakalabay’ng dekada ug usa sa mga nisaka ang kahibalo sa natad sa mathematics.

Giangkon sa Department of Education nga resulta ni sa kontribusyon sa mga magtutudlo, school leaders, ginikanan, local governments ug uban pang kaabag.

Dako sad og papel ang gobiyerno ilabi na bahin sa pagbutang og mga haom nga opisyales nga modumala sa DepEd.

Kinahanglang padayunon ang pagatiman sa mga magtutudlo, seguridad, dugang mga eskuylahan ug mga learning materials sa mga bata.

Ang PISA nagsukod sa kahibalo ug kun salabutan sa mga tinun-ang nag-edad og 15 anyos sa natad sa science, math ug reading. 

Ilang gitan-aw kun kasabot ba sila pagsulbad og mga komplikadong problema, kritikal maghunahuna ug kamao sa komunikasyon.

 Ning bag-ong gipagawas nga assessment sa 2025 PISA, mapasigarbuhong gipahibalo ni Education Secretary Sonny Angara nga nakaiskor ang mga tinun-ang Pilipino og taas -- 373 sa science, 371 sa mathematics ug 367 sa reading.