Naangin sa politika!

Sa pagbukal na sa kawa sa politika, nag-iyahay na sa pagpanikaysikay ang mga politiko aron mapahumot ang ilang pangalan gumikan sa kahigwaos nila sa politikanhong ambisyon.

Wala may dautan kun himuon kini sa kaugalingon nila nga kapasidad ug labaw sa tanan dili maangin ang pundo sa  panudlanan sa kagamhanan nga iya sa mga magbubuhis.

Sentro karon sa kontrobersiya si Konsehal Gerardo Carillo tungod sa pagpasukip niya sa supplemental budget sa P112 mil isip abag sa dakbayan sa reunion sa pamilyang Abella.

Ang Abella Clan gihulagway sa konsehal nga dako og natampo sa kasaysayan ug paglambo sa dakbayan sa Sugbo. Kun atong hatagan og pagsabot ang rason ni Carillo, tingali adunay gamay nga justification.

Apan ang pangutana kun ingon ba usab niini ang pagtagad nga gihatag sa konsehal ngadto sa matag banay nga nanimuyo sa dakbayan sa Sugbo sanglit nakatampo usab sila sa paglambo sa syudad tungod sa pagtuman sa lagda pagbayad og buhis?

Kun mahimo nga hatagan og patas nga ayuda nga pinansyal ang tanang family reunion sa mga nagpuyo sa dakbayan, tingali dili na isyu ang gihimo ni Carillo.

Bisan og wala na ipamugos sa konsehal ang gipangayo nga financial assistance apan nakahatag kini og kahasol sa malinawon, limpyo ug giampingan nga bansagon sa mga Abella.

Wala sila magdahom nga sa gihimo ni Carillo maamong sila sa kainit karon sa politika sa dakbayan sa Sugbo.

Alang sa mga politiko nga gusto’ng mopahumot sa ilang kaugalingon ngadto sa mga tawo, kuot nalang mo sa kaugalingon ninyong bulsa aron dili na maisyu!