Way kasulbarang baha
Nadapit akong pagtagad sa kumpisal sa post sa Facebook sa kabakikaw sa kadiyot niyang kalibog unsa ang hulagway nga iyang gitan-aw--ang fluvial procession pa ba sa pilgrim image ni Sr. Sto. Niño sa Pasig River sa kaulohan niadtong Domingo o ang kalit ug lawom na bang baha sa A.S. Fortuna sa Mandaue City.
Nakapalibog niya ang hulagway sa duha ka oras nga fluvial procession ni Sr. Sto. Niño gikan sa Intramuros, Manila paingon sa Guadalupe, Makati City nga gimantala sa website sa Catholic Bishops Conference of the Philippines (CBCP) ug ang hulagway ni JR Chan sa baha duol sa iyang buhatan sa A.S. Fortuna.
* * *
Mas dakong kalibog sa mga Sugbuanon: Nganong human gastohi og minilyon ka pesos pagkubok og lawom nga mga kanal ug paglubong og higanteng mga imburnal, ug human sa pila ka buwan nga pagsakripisyo sa mga motorista ug mga pasahero sa grabeng kahuot sa trapiko, gibahaan man lang gihapon ang A.S. Fortuna?
Mas mohuot ang atong dughan sa kahigayonan nga nakawang ang tanan natong pagsabot sa way kahumanan nga trabaho sa mga kontraktor sa Department of Public Works and Highways (DPWH). Ug makahaling og mas lawom nga kasuko ang kabalaka nga sama sa naandan mahimong nausik na sab ang atong siningtan ug hinagoan nga buhis.
* * *
Moinsistir pa ba ang DPWH sa ilang orihinal nga katin-awan nga magsige pang baha sa A.S. Fortuna kay wa pa matiwas ang trabaho, labi na nga mao pay pagsugod sa ubos nga tumoy sa proyekto? O andam na silang moangkon nga nasayop sila sa pagbanabana nga mas dagkong mga imburnal ray makasulbad sa baha?
May laing katin-awan ang mga inhinyero sa Mandaue: Mas lisod sulbaron ang baha sa A.S. Fortuna tungod sa pagdumili sa mga tag-iya sa naglibot nga pribadong mga luna nga makaagi ang drainage system sa ilang kabtangan, nga mas laktod untang mohabwa sa baha ngadto sa kinadul-an nga sapa.
* * *
May pagtuon ba gyong Mandaue ug DPWH sa tukmang gidaghanon sa baha nga na-imbudo sa A.S. Fortuna gikan sa bukirang mga barangay sa Cebu City ug sa ibabaw sa Mandaue? Natino ba gyod nilang padak-anay sa imburnal ang gikinahanglan? O mas epektibo ang pagpangita og alternatibong agianan sa kusog nga bul-og?
Lisod ang problema. Sa kredito sa Mandaue ug DPWH ug ni Kongresista Luigi Quisumbing, naningkamot sila sa makadaghang higayon pagsulbad sa baha. Mahimo hinuong di pa igo ang labing uwahi nilang pagsuway. Ang pait nga kamatuoran mao nga way katin-awan nga makahupay sa pagmahay sa mga Sugbuanon nganong padayong nameligro ang ilang kinabuhi ug kabtangan sa dan nga gigastohan na og minilyon ka pesos ug taas na uyamot nga pailob.
- Latest
