Maglisud g’yud pagtuman

Kun ako’y regional director sa National Police Commission (Napolcom) unya wala ko makontento sa kampanya sa kapolisan pagsumpo sa ilegal nga kalihukan sa barangay nga ako nagpuyo, mohimo g’yud ko og lakang batok sa hingtungdang mga polis.

Kini maoy tumong ni Mayor Michael Rama nga iyang gihagit si Napolcom-7 Regional Director Homer Cabaral ug ni Kongresista Rodrigo “Bebot” Abellanosa nga moabag sa kapolisan aron masumpo na ang problema sa drugas ug ilegal nga sugal sa mao nga barangay.

Ambot lang og makahimo ba kaha sila si Director Cabaral ug Kongresista Abellanosa sa hagit ni Mayor Rama kanila. Labaw na g’yud nga maglisud pagtuman sa hagit sa mayor mao si Duljo-Fatima Barangay Captain Elmer Abella.

Kun sa sinultihan pa sa mga bata,  “sangud” kaayo kun si Kapitan Abella moabag sa kampanya batok sa mga ilegal nga sugal ug drugas diha sa iyang barangay.

Ang “sangud” binisaya kini sa “amulet” kon anting-anting. Nagpasabot nga wala gayud sila magtuo nga ang higala nako nga kapitan sa barangay moabag sa kampanya aron madakpan ang mga katagi-lumolupyo.

Unsaon man nato, duna man g’yuy mga tawo nga gusto lang g’yud mahimo’ng opisyal sa barangay unya dili mauwaw nga dili sila makapatuman sa balaod diha sa dapit nga sakop sa iyang teritoryo.

Angay ‘sab nga tinud-on ni Mayor Rama si Senior Superintendent Marciano Batiancila nga molihok na batok sa nagpasiugda sa mikuyanap na nga ilegal suwertres operation dinhi sa dakbayan.

Personal nako nga gitug-anan si “Colonel” Batiancila kabahin sa operation sa ilegal suwertres dinhi sa dakbayan apan hangtud karon wala pa gayud siya molihok.

Unsay buot ipasabot niini Colonel? Unsay himuon nimo Mayor Mike?

* * *

Ngano nga gigamit man ang pipila ka tulda (tents) nga iya sa Cebu City School Board diha sa usa ka private subdivision sa Barangay Kalunasan nga nagpasundayag sa ilang “model house?”

Usa ka tigpaniid sa Banat News mipadala kanako og hulagway sa model house sa mao nga subdivision unya diha sa tupad gigamit ang duha ka tulda nga iya sa Cebu City School Board.

Tinuod ba nga si Raddy Diola ang tag-iya niini nga subdivision? Si Raddy Diola man gud maoy gitahasan ni Mayor Rama sa pagdumala sa Local School Board.

Kun tinuod man nga ang subdivision iya ni Sir Diola unya gipagamit niya ang mao nga mga tulda sa Cebu City School Board alang sa private business, mura’g dili maayo.

Nangambisyon ra ba kini si Sir Diola nga mahimo unta nga konsehal sa dakbayan sa Sugbo mao nga magmatngon g’yud unta siya nga dili mabulingan ang iyang kadungganan. Dili ba sir?

Alang kanako, ang mga tulda nga iya sa dakbayan o sa Local School Board mahimo ra nga gamiton kun ang kalihukan dili “purely private business matter.”

* * *

Si Grace Luardo, hepe sa City Environmental Sanitation Enforcement Team (CESET), ipasuspenso kuno sa mga magtutudlo kay nasakpan man sila nga wala maka-segregate sa mga basura sa ilang classrooms.

Matud pa ni Grace nga gikasab-an kuno siya pag-ayo sa usa ka abogado sa dakbayan sa Sugbo. Uy, ngano gud tawon nga mangasaba ka man “atorni?”

Dili ka ba diay malipay ug dili ka ba diay mosuporta nga aktibo kaayo ang gitugyanan ni Mayor Rama sa pagpatuman sa waste segregation? Kun ikaw man gani ang gitahasan sa pag-imbestigar sa reklamo, ayaw pangasaba.

Ang imong buhaton mao nga kun matimbang-timbang nimo nga nakahimo og sayop ang pangulo sa CESET, irekomendar nga silotan apan dili tukma nga mangasaba ka.

Masabot hinuon atorni nga tua ka milaban sa mga maestra nga milapas sa mga lagda sa Republic Act 9003. Tsk! Tsk! Dili maayo ang imong gihimo atorni.