Masaker ng SAF: Dapat ’di PNP ang magsisiyasat
MAGIGITING na heneral ang iniupo sa Board of Inquiry na sisiyasat sa pagpatay sa 44 at pagsugat sa 16 na police commandos sa Mamasapano, Maguindanao, nu’ng Enero 25. Ganunpaman, mas magiging kapani-paniwala ang resulta ng fact-finding kung tagalabas ng PNP -- mga eminent citizens -- ang gagawa. Maraming rason kung bakit:
• Napapabalita na kasali sina Commander-in-Chief at suspendidong PNP Dir. Gen. Alan Purisima sa pagpaplano ng SAF mission. Minaliit din ni Interior Sec. Mar Roxas ang masaker bilang isang “mis-encounter” lang sa ka-ceasefire na Moro Islamic Liberation Front. Maiimbestigahan ba sila nang lubos ng mababang ranggo?
• Si Dir. Edgardo Ingking, ng Directorate for Integrated Police Operations sa Western Mindanao (at Philippine Military Class of 1982), ang pinuno. Kasama niya sina Dir. Benjamin Magalong, hepe ng Criminal Investigation & Detection Group (PMA ‘82), at Chief Supt. Catalino Rodriguez, Directorate for Research & Development (PMA ‘81). Magdadalawang-isip idiin ng tatlo si P-Noy at Roxas. Kaklase ng isa at upperclassman ng dalawa sa kanila si Purisima (PMA ‘81), na babalik sa puwesto sa Hunyo. Malakas ang sistemang seniority at kaklase sa PMA.
• Napabalita rin na hindi sumaklolo ang AFP. Mga ka-klase at seniors din nila ang mga matataas na officers doon.
• Hindi kaya mausisa kung ano ang ginawa ng Directorate for Integrated Police Operations, at ni Ingking mismo bilang may hawak ng Western Mindanao, na nakakasakop sa Muslim Autonomous Region at Maguindanao province?
• Dati nang bumubuo ang PNP ng fact-finding committee kung may masalimuot na insidente. Pero ngayon ay Board of Inquiry ang itinawag dito ni Roxas. Espesyal ba ang trabaho nito?
• Ani MILF vice chairman for internal affairs Mohagher Iqbal may sarili silang fact-finding. Duda ang madla dito, at sa bersiyon ng PNP.
- Latest
