Kun way kasiguroan ayaw na lang uy
Ambot misaler ba kaha ang “enducer” (matang sa ekipo nga mohigop sa tubig) nga giimbento ni Mayor JVR pagpahubas sa tubig nga naglaaw duol sa Tabunok public market sa Talisay.
Mibalik man diay paglunop ang maong lugar human gihabwaan sa naglaaw nga tubig kaniadto’ng miagi’ng semana. Maayo unta kun masulbad kini nga dili kaayo dako og gasto.
Ang Cebu City giingon man nga masulbad lang ang pagbaha sa karsada niini kun mogahin ang gobiyerno og P4 bilyones. Pagkadako baya sa maong kantidad. Maayo unta kun masiguro nga dili na mobaha pagbalik, apan kun walay kasiguroan, mas maayo pa nga pasagdan na lang ang baha, total mohubas man usab dayon kini ug naanad na man ang taga siyudad sa maong kahimtang.
* * *
Daghan gihapon ang mga senior citizens dinhi sa dakbayan sa Sugbo nga wala makakobra sa tag P2 mil nga cash assistance matag usa kanila atol sa pagpanghatag kaniadto’ng Sabado.
Kadto’ng wala pa makakobra mahimo nga kobrahon ninyo adto na sa City Treasurer’s Office hangtud sa Nobiyembre 7. Lapas niini nga petsa dili na ihatag.
* * *
Andam na nga iparehistro ni Dr. Paulus Cañete ang Ako Media Party-list sa Comelec.
Mokuha og tagsa ka representante gikan sa radio, television, ug pamantalaan nga morepresentar sa maong partido sa umaabot nga election sa 2016. Hinuon iya pa’ng tigumon ang tanang sakop sa media sa Cebu aron botohan sa tanan ang maong mga representante.
Kinahanglan nga ayuhon gayud pagpili kinsa ang mahimo nga representante.
* * *
- Latest
