Dili tanan
Dili tanan, kini maoy ulohan sa sikat nga awit sa akong higala nga si Rommel Tuico.
Wala gyud siya magdahom nga mamahimong ingon niini kasikat ang maong kanta sa pagkakaron.
Si Rommel nagsilbi nga lead vocalist sa banda nga Stage Crew kaniadto hangtud nga mibiya siya ug nagsolo.
Sa iyang pagsolo napadpad siya sa gawas sa nasud diin nagsilbi siya nga singer sa usa ka cruise ship.
Didto sa cruise ship niya namugna ang maong kanta. Didto sab niya kini i-record.
Samtang padayon siyang nagtrabaho sa cruise ship, luyo sa iyang kasayuran, ang iyang composition nisikat na og maayo dinhi sa Pilipinas.
Gitugtug dili lang sa mga istasyonan dinhi sa Sugbo kun dili lakip usab didto sa kaulohan. Matod ni Romel nga nahibong siya pag-abot niya sa Pilipinas nga labihan nang sikata sa iya komposisyon.
Talagsaon ang iyang talento. Gikatandi siya sa mga sikat nga novelty singers sa nasud sama ni Max Surban. Angayan nga suportahan sa mga Sugboanon ang atong kaugalingong talento pinaagi sa pagpalit sa orihinal sa kopya sa iyang album diha sa mga authorized record bars.
Angayan usab nga ipakita sa goberno ang suporta sa kaugalingong mga talento pinaagi sa pagpahigayon sa subsub nga kampanya batok sa mga peke nga album nga naghitak karon sa ka merkadohan.
Usa sa mga angayang atangan sa publiko mao ang laing album ni Romel diin nalakip ang bag-o niyang komposisyon nga naghisgot sa umaabot nga piniliay sa barangay. Ang maong komposisyon giulohan og Election Rhapsody.
Makalingaw ang maong kanta tungod kay gituki niini ang realidad sa atong katilingban panahon sa piniliay. Sigurado ko nga daghan ang maigo sa maong kanta. Apan labaw sa makapahimoot nga lyrics sa kanta nagpahipi ang mensahe niini dili lang ngadto sa mga politiko kundi lakip na sab sa mga tawo nga pahimuslanon.
* * *
- Latest
