Bakakon ka!

Dinhi lamang sa Pilipinas masinati ang kalisod pag-prosecute og mga kawatan nga anaa sa gobyerno.

Sulod na sa pipila ka dekada nadunggan sa mga tawo ang korupsiyon sa bisan unsang ahensiya ug opisina sa gobyerno – nasyonal o lokal – apan hangtod ning mga gutloa, diyutay lang ang nataral sa hukmanan.

Nianang puntoha, akong ipaabot ninyong magbabasa ning atong Tikdol ang akong dakong kahadlok nga wala gihapo’y kapaingnan kanang mga “tralala” kalabot sa pork barrel scam.

Ang gidak-on lang daan nga P10 bilyones nga kanunay’ng gikondisyon sa utok sa publiko nga maoy nakawat pinaagi sa mga bogus nga NGO ni Janet Lim Napoles, usa sa basehan sa akong pagduda nga adunay tabon-tabon nga nanghitabo.

Ang P10 bilyones, sumala pa ni Fr. Ramon Echica Jr. sa iyang wali kagahapon sa Santos nga Misa atol sa pagbukas sa 2013 Press Freedom Week sa Blessed John XXIII Seminary nga kining P10 bilyones gamay ra kaayo kini sa kinatibuk-ang pundo sa nasud. Gamay ra kaayo kini sa tinuod nga gikawat nga wala nato masakpi. Sa ato pa, adunahan unta kaayo ang Pilipinas, galing lang kay wala mamaayo paggamit ang pundo ug wala molahos sa angayan gastohan ang atong pundo.

Sa dihang misugod og kanta ang trabahante ni Janet nga si Benhur Luy, nag-anam og panglutaw ang mga ngalan sa mga magbabalaod nga giingong mikawat sa ilang Priority  Development Assistance  Fund (PDAF) nga giila natong pork barrel, pinaagi sa pag-divert ngadto sa mga NGO ni Janet.

Apan nagtuo ba kamo nga bag-o lang kini nahitabo?

Sayop kamo kun moingon mo nga bag-o lang kini.

Kay kining binuanga dugay nang nahitabo sa atong Republika.

Sumala ba gud, human na mibuto ang fertilizer scam diin daghang mga kongresista ang nasakpan nga ang ilang mga pork barrel gi-channel sa Department of Agriculture aron ipamalit og mga fertilizer. Nga bisan ang mga distrito sa mga siyudad nga minus kaayo og kabukiran, namalit og fertilizer.

Apan sobra sa katunga sa pork barrel napunta sa bulsa sa mga kongresista. Pipila sa mga kongresista sa atong probinsiya sa Sugbo apil niadtong binuanga, pero hangtod karon, wala gyud ko makamatikod nga adunay naposasan kanila.

Akong nabantayan, basta mo-deny lang sa media, impas na ang tulobagon.

Kining paghatag og hinabang (financial assistance) ngadto sa mga NGO dugay na usab kaayo kining tinuntoha.

Kaniadto, gamay-gamay lamang kini. Apan sa dihang nakit-an sa mga magbabalaod nga kining paghatag og hinabang sa mga NGO ug People’s Organization (PO) makapadaot diay nila pinaagi sa kickback nga tinunga sa ilang pork barrel, nag-anam og kadako ang eskandalo.

Apan nakita ba ninyo nga adunay usa kanilang mga kongresista o senador nga nagpa-interview ug miangkon sa ilang pag-donar og hinabang sa mga NGO?

Wala gyud. Grabe kaayong maka-deny, bahala na og balibalihon.

Dinhi lamang sa lalawigan, pila ka mga kongresista ang nasakpan sa rekord sa Commission on Audit (COA) nga mihatag og dakong kantidad sa ilang pork barrel ngadto sa Philforest nga tua magbase sa kauluhan?

Apan aduna bay miangkon kanila?

Kun sila nga mga magbabalaod atong tuhoan, limpyo kaayo ang Pilipinas, walay korap. Kay wala man gyuy mangangkon kanila.

Kana silang Presidente Noynoy Aquino, DILG Secretary Mar Roxas, DOTC Sec. Jun Abaya, ug daghan pa, mga kanhi kongresista kana sila nga nakabenepisyo sa eskandalo sa pork barrel.

Apan nangangkon ba gud sila?

Kay aduna may nakasakop nila, kun silay pasultihon, namakak ang nangakusar nila nga nangawat sila.

Apan sa mata sa publiko, klaro kinsa’y namakak.

Apan kun tinuod pa ang ilang sulti nga limpyo sila ug wala sila’y gikawat gikan sa panudlanan sa katawhan, ingon ba kaha niini ang sitwasyon sa Pilipinas karon?

Maayo kaayo ikanta: “bakakon ka, liar, evil ka!”