Andam ka na ba sa pilgrimage?

Giisip nga dako og matampo sa ispirituwal nga aspeto sa usa ka tawo ang pagsalmot og pilgrimage nga buot ipasabot, biyahe paingon sa usa ka sagrado nga dapit. Pilgrimage nga maisip ang gihimo sa mga unang Kristiyano kaniadto sa ilang pag-uban ni Kristo paingon sa Kalbaryo diin gilansang ug namatay ang Ginoo. Sa maong panahon, matawag nga usa ka dapit alang sa mga makasasala ang maong lugar diin gihatagan sa labing dakong silot sa kamatayon pinaagi sa paglansang sa krus ang usa ka kriminal. Apan ang maong biyahe paingon sa Kalbaryo, ang naghatag kanato sa bag-ong paglaom ug kinabuhi uban ni Hesu Kristo. Pait man ang maong kasinatian, apan maisip nga da’n ug biyahe kadto paingon sa mas balaang kinabuhi.

Ang mga kababayen-an nga naglakaw paingon sa gilubngan ni Hesu Kristo aron sa pagpaabot sa iyang gisaad nga mabanhaw siya human sa tulo ka adlaw, matawag ‘sab nga pilgrimage tungod kay usa ka balaang Diyos ang nabanhaw sa maong lugar. Ang matag biyahe paingon sa usa ka balaang dapit, matawag nga pilgrimage. Bisan ang atong tagsa-tagsa ka kinabuhi nga adunay daghang mga pagsuway apan nagtinguha nga magpuyo nga limpyo aron makab-ot ang balaang saad sa langit, usa ka taas nga pilgrimage. Ugma damlag, nagtuo ‘tang moabot ra gihapon sa maong lugar nga puno sa kadasig ug pagsalig base sa gisaad kanato sa atong Ginoo. Kining tanan, kasinatian sa gitawag nga pilgrimage.

Ugma, usa ka dakong oportunidad sa pilgrimage ang mahimong kasalmotan atol sa nasudnong misa pasalamat alang sa bag-ong gituboy nga santo nga Bisaya, si San Pedro Calungsod. Ang South Coastal Road diin nahimutang ang templete ang mamahimong usa ka balaang dapit diin magtapok ang gatusan ka mga pari ug obispo aron saulogon ang usa ka dakong selebrasyon. Ang simbahan niawhag nga mamahimong pilgrim ang mga tawo pinaagi sa pagsalmot sa nasudnong kalihukan. Ugma na mahitabo ang labing gipangandaman nga okasyon diin mokabat sa usa ka milyon ka mga deboto ug mga katoliko ang magtapok alang sa usa ka katuyoan—ang pagpasalamat sa grasya sa pagkabalaan.

Karon pa lang, makapanlimbawot na sa balhibo ang usa ka talagsaong okasyon diin adunay gibana-banang 300 mil ka mga layko ang maggikan sa habagatang Sugbo ang mopaingon sa templete. Laing kapin sab 300 mil  ang maggikan sa amihanang bahin ug laing pundok sa mga deboto ang mag-gikan sa fluvial procession alang sa imahen ni San Pedro Calungsod. Talagsaon ang maong okasyon kung diin tulo ka hugpong sa mga deboto ang mag-abot sa templete diin ipahigayon ang santos nga misa. Ug alang sa mga deboto o pilgrim, usa ni ka kalihukan nga di’ angayan nga palabyon bisan pa sa kainit sa panahon, kalapoy sa tiil, kahuyang sa lawas ug uban pang gipamati. Ang labing mahinungdanon nga kining tanan nga sakripisyo, mahatud ngadto sa kahitas-an tungod kay mao ni ang tumong ug tinguha sa usa ka pilgrim.

Daghang butang nga kinahanglan nga hinumduman ang usa ka pilgrim. Una sa tanan, di’ kalimtan nga ang maong taas ug lisud nga biyahe kanunay nga ubanan og pag-ampo tungod kay mao ni ang rason nganong nisalmot ka og pilgrimage. Di’ kalimtan ang pagbitbit og rosaryohan. Makatabang ang pagbitbit og payong aron kung mouwan o moinit, adunay igong panagang sa di’ masabtan nga lakat sa panahon. Makatabang og dako ang pagda’g makaon sama sa biscuit ug crackers aron nga kung gutmon, adunay gamay nga matunol sa baba. Di’ ‘sab kalimtan ang pagda’g tubig tungod kay gipanlantaw ang lagiting sa adlaw, mas uhaw ang pagbuwad sa init sa may templete.

Dako og tabang ang pagda’g tambal aron kung aduna kay gimulo o ang imong kauban, adunay daling ikatubag sa problema. Labaw sa tanan, di’ kalimtan ang paghalad og pag-ampo tungod kay mao ni ang hinungdan nganong adunay nasudnong misa pasalamat ug adunay ingon ini ka dakong grasya nga angayan nga pasalamatan. Ugma, haom nga mosuway nga mahimong pilgrim tungod kay sa gamay sakripisyo, igo na ni aron pahalipayan ang usa ka batan-on nga wa’ ra sa kumingking ang gihimong sakripisyo tungod ug alang sa pagtuo.

Email: [email protected] or [email protected]