Walay batasan

Nakonpirmar gayud sa usa ka opisyal sa City Hall nga daghan kaayong mga bastos nga nagpuyo sa ibabaw nga bahin dapit sa Sitio Laguerta nga sakop sa Barangay Lahug.

Tiaw mo, nasugatan mismo ni Alvin Santillana kaniadtong Sabado ang daghang mga sinako nga basura nga gipaanod sa baha nga sagad anha mobul-og sa gamay’ng karsada kilid sa Aderan Hotel sa eskena Gorordo Avenue ug Salinas Drive. Bisan ako nakabantay niining binuang sa ubang mga tawo nga nagpuyo sa ibabaw nga bahin sa Sitio Laguerta ug ingon man diha unahan sa Aderan Hotel. Kun mao kana ang ilang himoon, maayo tingali nga tutokan kini ni Mayor Michael Rama.

Pananglit ang maong mga pamilya anaa mag-ugbok og balay sa yuta nga para na unta sa karsada mas maayo nga panggub-on ang ilang kabalayan. Dili angay’ng kaluy-on ang maong mga tawo.

Kusog kaayo ang baha nga anha moagi sa karsada kay lagi napakyas man ang atong kagamhanan sa paghimo og daku-daku nga drainage system sa tubig nga gikan sa ibabaw. Apan dili usab maayo nga kun magbaha na ipaanod ra nila ang ilang basura sa baha kay ang resulta ana adto magpunsisok ang mga sagbot sa ubos nga bahin. Wala ba gayud kini moabut sa huna-huna sa maong mga tawo?

Alang sa mga opisyal sa Barangay Lahug, bilib man gayud ko aning Konsehal Mary Ann De Los Santos, palihug kuno Ma’am sulbara kining problemaha nga ang imong mga lumulopyo diha mawad-an sa maayong panghuna-huna kun magbaha.

* * *

Unya, naghisgut na man gayud kita niining karsada nga manukad diha sa duol sa Aderan Hotel paingon sa Sitio Sun-ok nga sakop sa Lahug. Samok gayud kaayo ang maong dapit nga gihimong merkado ang aseras.

Si Mayor Michael Rama nagplano nga papahawaon ang maong mga tindera gikan sa maong dapit apan kutob ra man sa sulti. Apil gani niya nga gisaad mao ang paglimpyo sa Tabada Street nga gihimo gihapon nga merkado.

Dili man gayud kinahanglan nga ang mayor maoy mangunay sa paglihok apan kinahanglan nga ang iyang mga sinaligan nga iyang tahasan dili usab magmika lang nga hangtud makalimtan na lang. Katapusan namo nga interview ni Rama duna siya’y gitahasan nga iyang sinaligan aron makig-estorya sa maong mga tindera, apan dugay na kaayo kadto ug wala gayo’y kalamboan.

Kadaghan diha sa mga kawani sa Office of the Mayor nga walay mga klaro nga trabaho. Inigsulod pa lang nimo makakita ka na nga dunay ubang mga kawani nga walay gihimo.    

Kining maong mga tawo maoy tahasan. Duna pay usa ka consultant sa mayor nga maisip nga “buwanon” kay makit-an lang nimo kun takdol ang buwan. Kini atul nga ting-renyu na sa iyang kontrata.

* * *

Magpasalamat ko ni Danao City LTO Chief Eddie Mata kay gitabangan gayud ko niya nga mabag-ohan og plate number ang akong sakyanan. Unsaon nga didto unta ko nagpatabang ni Talisay City LTO Chief Bernardo “Dodong” Borromeo apan bisan og pareho pa kami og apelyedo, wala ko matabangi.

 Nagpatabang usab ko ni Alita Pulta nga maoy hepe sa LTO Cebu City Branch, utro pa nga linga kaayo, maayo lang sa sulti ug wala sa buhat. Karon nakaila na ko kinsa ang akong mga higala. Maayo lang sila motabang sa uban apan ako nga deputized agent pa sa LTO wala tabangi. Usbon ko, salamat kaayo ni higalang Eddie Mata.