Unsay buot ipasabot sa "Due Process"

Nakatutok karon ang publiko sa mga kalamboan sa Impeachment Trial ni Chief Justice Renato Corona ilabi na kay ang Impeachment Court gikatakda na nga mopakanaug sa ilang desisyon. Taliwala sa kontrobersyal nga pagwalk-out ni Corona sa Senado niadtong Martes ug sa iyang pagsud sa ICU daghan niini ang nagduda nga lain na usab kining drama. Apan ang dakong pangutana karon sa katawhan kun unsay epekto kanato kun makombikto o dili si Corona. Tinuod ba nga wa siya hatagi og due process? Mao kini ang pangutana nga atong tubagon karon.

Dear Atty Divine,

Wa gyud koy sipyat nga nagsunod sa Impeachment Trial kang CJ Corona. Nag-eskwela ako sa kolehiyo sa kurso nga Political Science dinhi sa Sugbo hinungdan nga na-interest gyud ko pag-ayo sa mga kalamboan karon sa kaso ni Corona. I think, halos tanan atty nakatutok karon sa kaso ug ilang giatangan si Corona makombikto ba siya o dili. Niadtong Martes, sa dihang miatubang sa Senado si Corona isog kaayo siyang mideklarar nga siya gigukod sa gobiyerno ug matud pa way “due process” ang gipasakang reklamo batok kaniya. Ang akong pangutana atty kun unsa man diay nang due process ug wa ba diay ni mahatag kang CJ Corona? Unsa may epekto nato ilabi na sa mga ordinaryong tawo kun pananglitan makombikto si Corona? Hinaut imong hatagan og pagtagad ang akong pangutana. — Anthony”

Dear Anthony,

Salamat sa imong pangutana ug mao gyud ni akong giuna sa pagtubag tungod sa kainit sa maong issue karon. Kanang “due process” mao ni nalatid sa atong Constitution nga anaa sa Article III sa Bill of Rights, section 14 (1). Buot ipasabot niini nga ang tawo nga imong pasanginlan di dayon hukman, kinahanglan nga hatagan gyud kini og kahigayunan nga makatubag o makadepensa sa tanang pasangil batok kaniya. Sa kaso ni Corona, kanang Impeachment Trial kabahin na kana sa “due process” nga diin ang matag habig mipresentar og mga ebidensya aron matimbang-timbang sa mga senador-judges kun sad-an ba si CJ Corona o dili. Sa akong tan-aw wa man mahikawi niini si Corona ug gani mas strikto pa ang Impeachment Court sa Prosecution kay sa Defense Team ni Corona. Sa imong ikaduhang pangutana, ang akong tubag, wala tay makuha. Ngano man, kay ang presyo sa atong mga palaliton magpabiling mahal, ang atong mga binuwan nga bayranan sama sa tubig, kuryente ug rentals di gyud mobarato bisan pa kun makombikto si CJ Corona. Ang tuition fee dili mokunhod makombikto man o dili si Corona. Hinuon ang bintaha lang kun makombikto siya kay at least nahatagan og hustisya ang katawhan kun ugaling tinuod ning mga pasangil batok ni CJ Corona ug kun ma abswelto siya, mao nay giingon og sorry nalang sa Prosecution ug sa Administrasyon. — Atty. Divine

Karong Lunes o Martes mopakanaug na og desisyon ang Impeachment Court ni CJ Corona. Matud sa uban nga ang gihimong pagwalk-out ni Corona hayan maoy dakong hinungdan sa iyang conviction. Tinuod, salawayon ang gihimong pag walk-out sa Chief Justice kay bisan sa mga ordinaryong korte, ang mga ordinaryong abogado mananghid man gyud sa Huwes kun mogawas sila sa korte. Apan bisan pa niining tanan, hinaut nga patas gihapon ang Senado nga modesisyon sa maong kaso basi sa mga ebidensya ug konsensya ug dili base sa politika. Kun aduna moy pangutana, ipadala lang sa;

LEGAL CORNER, Atty. Divine Marcial-Flores   c/o Banat News, corner D. Jakosalem and V. Gullas Sts., Brgy. Sto. Nino, 6000 Cebu City or email sa [email protected]