EDITORYAL - CJ Corona paatubangon sa Impeachment court

Sipa kaayo ang awhag sa mga magbabalaod sa kongreso nga paatubangon gyud si CJ Corona sa impeachment court aron personal siya nga makita sa publiko ug mabati usab ang iyang tingog.

Apan labaw sa tanan makadepensa siya sa iyang kaugalingon sa mga pasangil nga daghan kaayo siya og katigayonan ug kabtangan dinhi sa nasud ug sa gawas.

Di man mahimo nga abogado nalang niya ang iyang tugyanan sa iyang mga katarungan nga di man siya disabled person.

Unya adto siya motubag sa mga pangutana sa peryodista ug sa ubang grupo nga iyang ikaatubang ilabi na kun himoon siyang dinapit sa mga dagkong panagkatigom sa sosyidad.

Adto niya personal nga ipanghimakak ang mga pasangil nga gihan-ok kaniya sa prosecution nga mura nalang hinuon og susama siya sa usa ka ordinaryong tawo sa nasud.

Ang pagtan-aw gud sa publiko sa mga tawo nga sama kang CJ Corona, halangdon man gud, ligdong, kapiyalan ug kasaligan nga angay himoong idolo kun sumbanan sa tanan.

Ang mga katungdanan nga sama sa kang Corona, di gyud unta angayang madungog nga maoy unang molapas sa balaod nga gipatuman sa kagamhanan tungod kay sila ang angayang mahimong sumbanan    sa pagtuman niini.

Kun pasagdan o itolerar sa kagamhanan ang sistema nga iyang gisagop nga daghan og kuwarta nga kinitaan gumikan sa iyang propesyon ug negosyo sa iyang asawa, unya way timailhan nga mibayad og tukmang buhis niini sa goberno, kinsa may ordinaryong magbubuhis nga malipay kaniya.

Nga ang kabus kaayong mga kawani bisan wala nay ikapakaon sa pamilya , tilokan gyud sa BIR og buhis tungod kay wa may kapasidad sa pag-ikyas sama sa inabtik nga pamaagi ni CJ Corona.

Kun ang iyang mga teknik sundugon sa ubang magbabahis nga adunahan,   unya makaabot ang maong kaso ngadto sa Korte Suprema, mahimo ra diay niyang pasayloon kumo kay susama ra man kaniya og balhibo sa paglikay pagbayad og hustong buhis? Di ba?