Natural wonders

SIKAT tayo sa buong mundo dahil sa ating likas yaman. Natawag na tayong one of the biologically richest countries in the world. Ang tanyag na Puerto Princesa underground river ay kasama sa konsiderasyon bilang New Seven wonders of Nature. Kagubatan, karagatan, kabundukan, bulkan, mga mineral, lawa, ilog, sapa, mga beach at waterfalls — ilan lamang ito sa dahilan kung bakit ang Pilipinas ay hinahangaan sa labas ng bansa. Itong mga nakaraang araw ay nadagdagan pa itong mga “hayop sa gandang” katangian dahil sa dalawang “magandang hayop”.

Una dito’y ang Ms. World 1^st runner-up na si Gwendoline Ruais. Matapos pumang-apat si Shamcey Supsup sa Miss Universe Pageant, heto’t pumangalawa naman si Gwendoline sa Miss World. Napantayan nito ang ating pinakamataas na puwesto sa kasaysayan ng timpalak – ang 1^st runner up ding nakamit ni Ms. Evangeline Pascual noong 1973. Sinundan ang tagumpay ni Gwendoline ng pagpuwesto ding si Bb. Pilipinas-International Diane Necio sa top 15 semi-finalists ng Miss International competition. Muling napatunayan ang matagal nang kinaiinggitan ng dayuhang kababaihan: Ang kababaihang Pilipina ay hindi lamang pinakamabait at masipag sa buong mundo, ito rin ang pinakamaganda!

Kung sa pagandahan ay lumalaban tayo sa mga topnotcher, sa palakihan nama’y kumpirmado na tayong pinakamalaki sa buong sandaigdigan. Ang tinutukoy ay walang iba kung hindi si Lolong, ang higanteng saltwater Crocodile na nahuli sa Bunawan, Agusan del Sur. Ayon sa mga eksperto ng National Geographic na bumisita sa bansa para lamang sukatan si Lolong, ang official size ng buwaya ay 20.3 feet. Bago ito nahuli, ang kinilala nang biggest crocodile in captivity ay si Cassius ng Australia na nasukat sa habang 18 feet. Mantakin niyong higit sa 10% ang hinaba nitong si Lolong sa dating may hawak ng corona! World record ang kanyang size at siguradong papasok sa Guinness Book of World Records. “It was like measuring a dinosaur”, anila. Maaasahang dadagsain ito ng milyon milyong bisita.

Mayaman ang Pilipinas sa wonders of nature.