CHAMP dunay pinalabi
Sulod sa nanglabay’ng katuigan sukad mahimugso ang City Hospitalization and Medical Assistance Program kon CHAMP sa dakbayan sa Sugbo ang pagtuo sa tanan mao nga ang mga kabus lang ang mamahimong makapahimulos sa programa.
Uban niini mao usab ang pagtuo nga dili tinubdan ang panudlanan sa dakbayan nga mamahimong magpatuyang sila pagpanghatag bisan pila nga way limit. Ang publiko nakontinto nga ubos sa maong programa gawas nga mga pobre ray makapahimulos P3 mil ra say labing dako nga hinabang nga ilang madawat.
Apan sayop diay ta sa atong pagtuo niini tungod kay usa ka kanhi konsehal sa dakbayan sa Sugbo nakahimo man pagpahimulos sa maong programa. Bisan kun dili siya kabus nahatagan siya og hinabang sa dakbayan aron pagpatambal sa iyang sakit nga cancer.
Sukwahi usab sa gituohan sa publiko nga P3 mil ray labing dako nga hinabang nga makuha ubos sa CHAMP program, miabot og kapin sa P140 mil ang gihatag sa dakbayan ngadto sa kanhi konsehal.
Salamat sa Commission on Audit nga mikwestiyon sa maong hinabang tungod kay dili unta kita masayod nga wala diay gipili ang makapahimulos niini. Matud ni konsehal Joy Daluz III, agi og pagpasabot sa findings sa COA, dili kuno tinuod nga P3 mil ray limit sa hinabang nga makuha gikan sa City Hall.
Dili sab kuno tinuod nga mga pobre ray mamahimong mangayo og tabang ubos sa CHAMP gikan sa dakbayan. Nagkanayon si Daluz nga ubos sa programa tabangan sa dakbayan ang pasyente hangtud nga siya maayo sa iyang balatian.
Mao nga kinsa kadtong mga molupyo sa dakbayan nga dunay balatian hala adtoa ninyo si Daluz pangayo og tabang. Ayaw mo og sugot kun hatagan lang mo og P3 mil kay matud niya wala may limit ang mamahimo ninyong pangayoon hangtud nga maayo ang inyong pasyente.
Kun mobalibad si Daluz ilamparo sa iyang nawong ang report sa mantalaan nga nagkutlo niya nga way limit ang mamahimong pangayoon nga tabang gikan sa City Hall ug nga way gipili datu man o pobre.
Atong suwayan kun tinuod ba gyud nga wala sila’y pinalabi sa paghatag sa maong binipisyo.
* * *
- Latest
- Trending
