Uyon na ba ang Simbahan?

Balitok sa sitwasyon ang bag-ong kalambuan niadtong miaging adlaw sa dihang mipahibalo ang mga obispo sa Katoliko Romano nga Simbahan sa pagpakahilom lang una sumala sa hangyo sa Malacañang.

Kini mentras wala pa magka-atubang ang mga lider sa Simbahan ug si Pres. Benigno Simeon Aquino III aron tukion ang matag nila ka baruganan kalabot sa isyu sa reproductive health.

Karon pa ko makadungog nga mibahar og gamay ang Simbahan aron hatagan og higayon ang gobyerno nga makapasabot sa baruganan niini kalabot sa programa niini pagpugong sa pagdaghan sa populasyon ning nagkalisud natong nasud.

Makaingon hinuon ko nga maka-bilib ang “diplomatic skills” ni Pres. Aquino tungod ning nahitabo karon nga ang Simbahan mitahod sa iyang hangyo nga magpakahilom lang una ang isigka habig mentras wala pa magkaabot ang mga obispo ug ang president.

Dili hinuon ko motuo nga adunay mga envelop nga gipang-apud-apod ngadto sa mga obispo gikan sa Malacañang aron pahilumon kini. Ang executive secretary mismo sa Episcopal Commission on Family and Life sa Catholic Bishops Conference of the Philippines (CBCP) nga si Fr. Melvin Castro ang miingon nga gitamod nila ang hangyo ni Pres. Aquino tungod kay president gyud siya sa Pilipinas nga nanghangyo kanila.

Kun nahinumdom kamo, niadtong panahon ni kanhi presidente, karon Rep. Gloria Arroyo, mapublikar dayon ang pagdawat sa mga obispo og mga sinubreng kuwarta gikan sa mga batos sa Malacañang bugti sa pagpakahilom sa pipila ka mga isyu.

Apan ning higayona nga mi-uyon ang Simbahan nga magpakahilom na lang una, usa na ba kini sa mga senyales nga nahigmata na kini sa suliran nga gisagubang sa nasud mugna niining “overpopulation”?

Mi-uyon na ba ang kadagkoan sa Simbahan nga ang pagpugong sa panag-abot sa sperm cell sa lalaki ug egg cell sa babaye (kun pagpugong sa conception pinaagi sa contraceptive sama sa condom) dili usa ka matang sa abortion?

Uyon na ba ang Simbahan nga kinahanglan na nga itisok sa matag pamilya ang maayong paagi sa pagplano sa pamilya?

Kining mga pangutanaha matubag kini kun ipublikar sa isigka habig unsay linugdangan sa panagtigum unya sa mga obispo ni Pres. Aquino.

* * *

Lain na usab nga kasong kalapasan sa Anti-Graft and Corrupt Practices Act ang gisang-at sa naulang whistleblower nga si Crisologo Saavedra batok sa mga sakop sa board sa Mactan Cebu International Airport Authority (MCIAA). Lakip sa gikiha si Gob. Gwendolyn Garcia kay sakop man kini sa board.

Sa sulat-sumbong ni Saavedra, iyang gihangyo ang Ombudsman Visayas sa paghimo og imbestigasyon sa katukoran sa Administrative Building sa MCIA nga matud pa wala matiwas tungod sa “claim” sa pamilyang Godinez.

Kun tinuod ang gisumbong ni Crisologo Saavedra ngadto sa Ombudsman, P65 milyones gikan sa kuwarta sa mga tawo ang na-usik tungod sa pagtukod og edipisyo sa luna nga gipanag-iya og pribadong tawo.

Pila naman kini ka kasong gi-atubang ni Garcia?

Daghan na. Dili lang ko makahatag og saktong gidaghanon. Pero ayaw na lang nang gidaghanon, kana lang gidak-on sa kaso sama sa pagpatukod sa overpriced nga Cebu International Convention Center (CICC) nga karon gilangaw ug ang pagpalit sa luna sa mga Balili sa Naga nga naglubog sa tubig-dagat.

Pero, wala man gihapon aksiyoni sa Ombudsman-Visayas, nahuman na lang ang eleksiyon. Tingale, mag-eleksiyon na usab sa 2013, dili gihapon kini maresolbar o resolbahon sa Ombudsman.