Media power

Maayo ang lakang sa Philippine Press Institute (PPI) nga miandam nang daan sa mga senior members sa media kabahin sa gimbuhaton sa nagsingabot nga eleksyon.

Usa sa dakung kalihukan sa PPI mao ang seminar sa mga piniling sakop sa media nga adto ipahigayon sa usa ka dakung hotel sa Cagayan de Oro City unya sa Oktobre 19 hangtod sa 21.

Ako ang gipili ni The Freeman editor-in-chief Jerry Tundag nga morepresentar sa among kompaniya pagtambong sa maong kalihukan nga apilan sa mga inilang sakop sa media sa lainlaing dapit sa nasud.

Malipay ko nga motambong niini kay aron mabaid pag-ayo ang atong kaisipan kun unsaon pagpalambo ang maayong “coverage” sa eleksyon.

Higayon na usab kini nga ikahimamat nako pagbalik si Madam Yvonne Chua, ang kanhi training director namo sa Philippine Center for Investigative Journalism (PCIJ).

Wala ko magduha-duha pagdawat sa tanyag nga ako’y morepresentar sa The Freeman sa maong seminar-workshop kay nasinati na ko sa batasan ni Madam Yvonne.

Dihang usa ako sa participant kaniadto sa Investigating Corruption Course nga gipasiugdahan sa PCIJ didto sa Manila, nakat-on g’yod ko kay estrikto si Madam Yvonne modumala og seminar.

Moingon gani nga alas 8 sa buntag magsugod, kinahanglang wala pay alas 8 tua ka na sa room.

Ang media man god maoy usa sa dunay dakung tahas aron ang mga botante makapili sa maayong kandidato nga pilion atul sa usa ka eleksyon.

Kun ang mga sakop sa media makahatag og giya sa mga botante unsa nga matang ang usa ka tawo nga magpapili, magiyahan sila kun kinsa ang angay nga pilion.

Sa laktud, ang mga tawo nga mamalit og mga botos, dili gayod angay’ng padag-on.

* * *

Nindot nga dawaton ni Gobernador Gwen Garcia ang pagdapit ni Mayor Tomas Osmeña nga moapil siya sa pagtan-aw sa Mariners Court Building sa Pier-1 aron itandi kini sa Cebu International Convention Center.

Kun moingon si Gwen nga mas nindot g’yod ang CICC, angay niya nga hinumdoman nga ang Mariners Court migasto lang og P160 milyones, dili sama sa CICC nga gigastohan og kapin sa P900 milyones.

Kun si Osmeña nakadayeg na man gani sa pito ka andana nga Mariners Court Building, maingon nato nga mahurot tingali ang pagdayeg sa mayor kun ang gasto miabot pa og P900 milyones o bisan og gidoble lang.

Bisan ako, makaingon g’yod nga layo ra sa Mariners Court Building ang CICC. Ang CICC magtulo na gani kun mag-uwan bisan og bag-o pa nga nahuman.

Kun anha ka sa dapit sa lobby sa building, hangda ang kisame dili ba hinay-hinay na nga nadunot nga unta duha pa man ka tuig.

Mga 100 ka sakop sa media ang gidapit sa mayor atul sa maong okasyon. Anaa sa second floor sa maong Mariners Court building ang among estasyon sa DYLA mahimutang.

* * *

Abi nako og ang tanang motorista nalipay nga nasuspenso ang deputization sa mga LTO agents nga sakop sa Task Force Alpha, daghan man usab diay ang naguol.

Ang uban nga tarong og pangisip nakabantay g’yod nga midaghan karon ang mga badlongong drayber. Sa akong pagsukit-sukit hinoon, ang mga PUJ driver nangalipay, apan ang mga private motorists lahi og baruganan.

Masabot nako nga ang grabe gud nga malapason sa balaod sa trapiko mao man ang mga PUJ drivers mao nga natural, lipay sila.

Maayo lang nila silang dakolon ang ulo ug sa mga opisyal nga nagdugay-dugay pag-aprobar sa deputization sa Task Force Alpha kay may nagpahipi diay nga kwestyonable nga rason.