Ang hagit sa sulbad sa drugas

Tungod sa rekomendasyon ni Vicente Sotto III nga mao ang Chairman sa Dangerous Drugs Board gimando ni Presidente Gloria Macapagal-Arroyo ang pagpaubos sa random drug test sa mga tinun-an sa sekondarya ug kolehiyo lukop nasud. Nunot ning maong kamandoan misuki ang mga wa makauyon niini. Matud nila kalapasan sa tawhanong katungod ug sa ilang privacy ang lakang sa gobiyerno.

Makasulbad kaha sa suliran sa ginadili nga drugas ang random drug test? Masulbad ba ang suliran sa ginadili nga drugas kun ang usa ka tawo masuta nga positibo nga naggamit niini? Ambot lang nila!

Kun buot mang sulbaron sa gobiyerno ang suliran sa drugas nganong i-sentro man ang kampanya niini ngadto sa mga tiggamitan nga biktima lamang? Nganong dili man i-sentro sa gobiyerno ang iyang kampanya sa mga sindikato nga nagpakatap niini?

Ang random drug test dili makasulbad sa suliran sa ginadili nga drugas bisan man tuod kun kini makaila sa tiggamitan. Ang pag-ila sa tiggamitan makasuta lamang kun pila na sila apan dili kini makapahunong sa negosyo sa ginadili nga drugas busa dili kini epektibo nga sulbad sa nahisgutang suliran.

Ang random drug test makapa-enganyo hinuon sa graft and corruption ug magdugang lamang sa bug-at nang gastoanan sa mga ginikanan kun ang drug test dili libre. Ang drug testing center lamang ang makabenipisyo ning maong lakang sa gobiyerno.

Kun ang gobiyerno seryoso gayod sa pagsulbad sa suliran sa ginadiling drugas, ang himuon lamang niini mao ang pagpatuman sa tibuok nga kusog sa balaod sa ginadiling drugas nga walay kompromiso, ang pagpalig-on sa maayong relasyon sa matag pamilya ug moralidad sa sociedad.

Kun ang nalambigit sa pagpayuhot sa ginadiling drugas maabsuwelto o dili mapasakaan og kaso bisan sa kalig-on sa ebidensiya tungod sa iyang koneksyon, ang pagpakiggubat sa ginadiling drugas ngitngit. Kun ang pamilya sa katawhang pilipinhon padayon sa iyang pagkabungkag, ang pagpakiggubat sa suliran sa drugas ambition lamang. Ug kun ang moralidad sa sociedad padayon sa iyang pag-ubos, ang pagsulbad sa suliran sa drugas usa lamang ka damgo.