Sangka sa sunod nga mga henerasyon

Ang panag-abot sa batan-ong mga henerasyon sa mga pamilya sa tulo ka mga kanhi mayor sa dakbayan sa Mandaue sa umaabot eleksiyon gipaabot nga maoy makahimong init ug interesante sa piniliay diha sa maong dakbayan.

Sila si Jonas Cortes, Amadeo Seno, Jr. ug Jonkie Ouano nga pulos mga anak og kanhi mga mayor sa Mandaue maoy magbagat sa pagkamayor karong Mayo. Gihulagway nga ang ilang panagsangka maoy sinugdanan sa pagkabuak na sa liderato sa pamilyang Ouano sa maong dapit sud sa taas taas na nga higayon.

Ang pagbuwag ni Seno ug Cortes gikan sa kampo ni Ouano nagpakita nga di pa diay hingpit nga kontrolado sa pamilya sa Mayor ang Mandaue.

Sud sa pipila ka tuig giduminar sa mga Ouano ang Mandaue, gikan sa gihulagway nga grand old man nga si kanhi mayor Pedong, ngadto ni Mayor Teddy nga maoy kasamtangang mayor.

Tungod sa mga proyekto nga iyang nasugdan diha sa dakbayan gusto ni Teddy nga kini mapadayon hinungdan nga iyang gituboy ang iyang anak nga si Jonkie aron mohulip niya.

Klarong gustong mugnaon sa mga Ouano ang usa ka dynastiya diha sa Mandaue. Sa pikas bahin, di sab hinuon hingpit nga kapanulisok ang kampo nilang Cortes ug Seno ngadto ni Ouano tungod kay sila gikan man sab sa pamilya sa kanhi mga mayor.

Apan ang labing mahinungdanon ug angayang tamdan sa mga Mandawehanon pagpili sa ilang mosunod nga mayor mao ang paglingi sa mga butang nga nahimo sa nangaging henerasyon sa tulo ka mga kandidato.

Dakong pangutana sa mga Mandawehanon kon matulon ba ninyo nga dumalahon mo'g dynastiya? Angayan sab nga tun-an og maayo sa mga Mandawehanon kon unsa may nahimo sa mga Ouano sud sa kapin sa dekada nga silay nagduma sa dakbayan kon itandi sa ilang mga kaatbang sa politika.

Si Seno hinuon posibling gituyo ni pagpadagan sa kampo ni Ouano aron pagbahin sa butos pagsiguro sa kadaugan ni Jonkie.

Matud ni Mayor Teddy nga gusto niyang ipasa ang nasugdan niyang mga proyekto ngadto sa iyang anak.

Ambot og hain nga mga proyekto ang gusto niyang padayonon ni Jonkie?

Ang merkado ba kaha nga wa gyud niya mapahuman bisan sa siyam ka tuig niyang pagdumala sa Mandaue o ang kapakyas pagbadlong sa mga durugista nga mitukod gyud gani og laboratoryo diha sa Mandaue.

Kon ang mga tigpaniid sa politika maoy paminawon, gusto ni Ouano nga ang iyang anak maoy mopuli aron siya maoy padayong maghari sa Mandaue. Matud sa mga political observers nga himoong kiko si Jonkie sa iyang amahan apan ang tinuod siya gihapoy magdumala niini aron protehian ang mga anomaliya ubos sa iyang administrasyon.

Si Teddy hinuon miingon nga di kunong mahitabo nga siya maoy magbuot kon ang iyang anak maoy makadaog kay matud niya dunay hustong pangisip ang iyang anak ug didto ni magtungha sa gawas sa nasud.

Ambot og makatabang ba kaha ni Jonkie ang iyang nakat-unan sa abroad nga wa man siyay kasinatian sa pagdumala sa gobyerno. Bisan gani og barangay tanod wa may kasinatian si Jonkie.

* * *

[email protected]